Наталья Полятинская салайааччылаах Кэбээйитээҕи “Сайдам” норуот айымньытын киинин үлэһиттэрин көҕүлээһининэн, Улуу Кыайыы 80 сылыгар, Арассыыйаҕа, Саха Өрөспүүбүлүкэтигэр Ийэ уонна Аҕа дойдуну көмүскээччилэр, Кэбээйи улууһугар Патриотизм, нэһилиэкпитигэр Аҕа дойдуга бэриниилээх буолуу сылларыгар анаан, “Кыайыы кынаттаах ырыалар” диэн ааттаах патриотическай хамсааһыҥҥа аналлаах нэһилиэкпит тэрилтэлэрин икки ардыларыгар ырыа күрэҕэ бэрт тэрээһиннээхтик ыытылынна.
Күрэххэ нэһилиэкпит холбоһуктаах тэрилтэлэрэ көхтөөх кыттыыны ыллылар. Бу күн уостан түспэт, норуокка киэҥник тарҕаммыт ырыалар ылланнылар. Эйэлээх олоҕу уһансыбыт, тыыл үлэтигэр кыайыыны турууласпыт бэтэрээннэрбитин, сэрии сылларын оҕолорун ахтан-санаан аастыбыт. Сахабыт Сиригэр Аҕа дойду сэриитин кэмигэр айыллыбыт ырыалар аҕыйаҕа суохтар. Ол курдук, төрөөбүт дойдуну көмүскүүр ыҥырыы ырыалар, төрөөбүт дойдуттан, чугас аймах дьонтон арахсыы, быраһаайдаһыы, ахтылҕан, сынньалаҥ кэмигэр ылланар, өстөөҕү самнаран кыайыы көтөллөөх кэлбит ырыалар ылланнылар. Олортон “Мин мантан сэриигэр барбытым”, “Кээчэ”, “Хайыһар”, “Журавли”, “В землянке”, “Синий платочек” курдук, айыллыбыт айымньылар сэбиэскэй буойуннары кытта Аҕа дойду Улуу сэриитин суолларынан тэҥҥэ сылдьыспыт ырыалары күрэх кыттыылаахтара иэйиилээхтик толорон, көрөөччүлэр биһирэбиллэрин ыллылар. Элбэх кыттааччылары түмэр сыаллаах, холбоһуктаах тэрилтэлэр ансаамбылларын толорууларыгар “Биэс уолаттарым”, “Эһээлэр Геройдар”, “Кыайыы күнэ”, “Тыыннаахтар умнубат сыллара” ырыаларга эр дьон кыттыыта биһирэннэ.
Олус тэрээһиннээхтик, үрдүк таһымнаахтын ыытыллыбыт “Кыайыы кынаттаах ырыалар” күрэх түмүктүүр түһүмэҕэ ыам ыйын 7 күнүгэр, Улуу Кыайыы өрөгөйдөөх тэрээһиннэригэр чаҕылхай нүөмэрдэри өссө төгүл көрдөрүөхтэрэ.