Аламай күммүт сылааһынан илгийэн, сааспыт барахсан тиийэн кэлиитин бэлиэтээн, муус устар ый 18 күнүгэр Кэбээйибит сиригэр “Кыһыны атаарыы, Сандал сааһы” көрсүү тэрээһинэ олус сэргэхтик тэрилиннэ. Сандал Саас кэлбитин үөрүүтүн үллэстэ нэһилиэкпит сынньалаҥ пааркатыгар норуот күүлэйигэр дьон-сэргэ, оҕо-аймах тоҕуоруһа муһунна.
Ефросинья Кириллина, “Сайдам” норуот айымньытын киинин уус-уран салайааччыта:
“Кэрэ Саас киэргэлэ” диэн эҕэрдэ кэнсиэр аһыллыытыгар толору самоварга кутуллубут итии үүттээх чэйинэн, арыылаах алаадьынан, блинынан мустубут дьону айах тутан күндүлээтибит. Сааскылыы ырыа түһүлгэтин кэнсиэригэр кыттыыны ыллылар: “Күбэйэ” эбээлэр түмсүүлэрэ, “Саһарҕа” врачебнай амбулатория вокальнай ансаамбыла, Марина Иванова, Николай Яковлев, Прокопий Иванов, Валерий Кривошапкин, “Сайдам” норуот айымньытын киинин эр дьон вокальнай ансаамбыла, Климентий Эверстов, Антон Петров, Александр Дьяконов. Кэнсиэркэ — Дьокуускай куораттан сахалыы таҥаска, киэргэлигэр-симэҕэр, саха быһаҕар маастар-кылаас ыыта кэлбит быыстапка-дьаарбаҥка кыттыылаахтара “Ыһыаҕым саргылаах таҥаһа, кэскиллээх киэргэлэ” диэн таҥастары кэтэн киирэн, кэпсээн-ипсээн көрдөрдүлэр, ыытыллар Олоҥхо ыһыаҕар таҥас тиктэн кэтэллэригэр ыҥырдылар.
Салгыы тэрилтэлэр икки ардыларыгар көрдөөх күрэх оонньуута олус сэргэхтик ыытылынна. Е.Е.Эверстов аатынан Кэбээйи орто оскуолата уонна “Сайдам” норуот айымньытын киинин эдэр үлэһиттэрэ үөрүүнү кытта 6 түһүмэххэ кыттан, оонньуу түмүгүн билбэккэ аһардылар. Күрэх кыттааччылара — тоҥуу хаарынан сүүрдүлэр, куулунан бэрсиһэн, куулу кэтэн ыстанан, чууркаҕа тоһоҕону саайан, хомуур хапсаҕайдаһан, канат тардыһан тыҥааһыннаах киирсиини аастылар. Сымсалары, быһыйдары быһаарыыга оскуола кэллэктиибэ 1 миэстэни, 2-с бириистээх миэстэҕэ “Сайдам” норуот айымньытын киинэ тигистэ. Кыттааччылар грамотанан, мэтээлинэн, минньигэс наборунан наҕараадаланнылар. Нэһилиэкпит олохтоохторо кыралыын-улаханныын күн уоттаах, күүтүүлээх күндү сылаас сааспыт күлүмүрдээн кэлбитинэн көрсүспүччэ көрүлээн, уолдьаспычча оонньоон Сандал Сааһы көрүстүлэр.
Венера Лугинова, Кэбээйи:
«Муус устар ый — саха муус түннүгүн устар кэмэ. Аламай күммүт улам унаарыйан, сандал сааһы көрсөбүт.
Бүгүн, Кэбээйи нэһилиэгэр «Кыһыны атаарыы» бырааһынньыгар самовардаах итии чэйинэн, сушка, блины, хворост бурдук астарынан кэлбит дьону үөрэ- көтө көрүстүлэр, ырыаларын — тойуктарын дьиэрэттилэр. Кыһыл уһун сарапааннаах, сибэккилээх былааттаах Ефросинья Кириллина кэрэ куолаһынан кэнсиэрди иилээн саҕалаан ыытара, бэйэтэ сандал саас курдук.
«Кэрэ саас киэргэлэ» эҕэрдэ кэнсиэргэ өрүүтүн кыттар « Күбэйэ» эйэҕэс эбээлэрин кулууптара (сал. Максимова М. С.) ордук көхтөөхтүк кытыннылар. Олоҥхо ыһыаҕар анаан тиктибит сахалыы оһуордаах соннорун, дьабака бэргэьэлэрин кэтэн хааман көрдөрдүлэр, сэргэхситтилэр.
Бүгүҥҥү тэрээһини олохтоохтор киэргэттилэр. Ол курдук, амтаннаах — иҥэмтэлээх ас арааһын атыылаатылар. Көрдөөх-нардаах оонньуулар оҕолорго умнуллубат түгэннэри бэлэхтээтэ.
Маны сэргэ, тэрилтэлэр кыттыылаах спортивнай оонньуулар уонна түөлбэнэн көрдөөх күрэхтэр буоллулар.
Бу курдук, оҕолуун улаханныын сандал сааһы үөрэн — көтөн көрүстүбүт. Олоҥхо ыһыаҕа буолуо 77 күн хаалла диэтилэр».
