Кэбээйитээҕи түмэлгэ «Кулуһун кут» уонна «Лена долгуннара» литературнай түмсүүлэр, «Күбэйэ» эбээлэр кулууптарыy көхтөөх кыттыылааҕа, бочуоттаах сынньалаҥҥа олорор, Матрена Николаевна Гуляева иккис хоһоонун хомуурунньуга тахсыбыт дьоро күнүн бэлиэтээтибит.
«Күбэйэ» эбээлэр кулууптан кини дьүөгэлэрэ, «Кулуһун кут» түмсүүттэн айар куттаах кыргыттар, оскуолаҕа бииргэ үөрэммит кылааһынньыктара, коллегалара, Кэбээйитээҕи модельнай бибилэтиэкэ сэбиэдиссэйэ, түмэл үлэһиттэрэ кыттыыны ыллылар.
Кинигэ сүрэхтэниитин Кэбээйитээҕи Г.Г. Кобяков аатынан модельнай бибилэтиэкэ сэбиэдиссэйэ Анна Павловна иилээн-саҕалаан ыытта. «Күбэйэ» эбээлэр кулууптарын кыттыылаахтара Матрена Николаевна бэриниилээх дьүөгэ буоларын, чөл олох уонна саха сирин эмтээх отторун туһунан кэпсээннэрин, куруутун инники күөҥҥэ буоларын бэлиэтээтилэр. Бу тэрээһиҥҥэ Матрена Николаевна тылыгар «Күбэйэ» кулууп өрөгөй ырыатын дьүөгэлэрэ толорбуттара умнуллубат түгэнинэн буолла. «Күбэйэ» кулууп салайааччыта Татьяна Семеновна Эҕэрдэ суругу аахта.
Татьяна Игнатьевна, Матрена Николаевна үөлээннээҕэ, коллегата кини дьаһайар, дьону көҕүлүүр дьоҕурдааҕын туһунан сэһэргээтэ. «Кулуһун кут» уонна улуустааҕы «Лена долгуннара» литературнай түмсүүлэр салайааччылара, Россия суруйааччыларын сойууһун чилиэнэ, Кэбээйитээҕи түмэл сүрүн харайааччыта Иосиф Григорьевич «Матрена Гуляева хоһоонноро олоххо тапталы, саҥа үүнэр күҥҥэ үөрүүнү туойаллар», – диэн түмүк тылы эттэ.
Матрена Николаевна хоһоонноро саха далбар хотунун аналын, дьылҕатын, чугас дьонугар, төрөөбүт дойдутун кэрэ айылҕатыгар итии-истиҥ тапталын судургу эрээри киһи дууһатын таарыйар тылларын хоһуйаллар. Кэрэ кэскил Кэбээйибит маннык дьоҕурдаах дьоннордооҕунан киэн туттабыт, кинилэр айар талааннарыгар сүгүрүйэбит.
Айталина Максимова