Унньуктаах уһун кыһын ааһан сандал саас сандаарыччы тыкпыт күнүнэн сыламнаан кэлбитин Кэбээйи нэһилиэгин олохтоохторо сынньалаҥ пааркатыгар уруйдаан көрүстүлэр. Бу күн ырыаны, үҥкүүнү, атыыны-тутууну таһынан түөлбэнэн күрэхтэһии тэрилиннэ.
Күрэхтэһии Саха сиригэр хайыһар спорда 100 сылынан, Аан дойдутааҕы «Лыжня России 2026» сүүрүү, Кэбээйигэ
ХХ-с үйэҕэ аар-саарга аатырбыт хайыһардьыттарын өйдөөн-санаан ааһар аналлаах. Тэрээһин сүрүн сыалынан-соругунан нэһилиэк олохтоохторугар чөл олоҕу тарҕатыы, хайыһар спордугар болҕомтону хатааһын, бастыҥ хайыһардьыттары бэлиэтээһин буолла.
Күрэххэ түөлбэлэр оскуола үөрэнээччилэриттэн саҕалаан 55 саастарын ааспыт кыттааччыга тиийэ бэлэмнээн киирэннэр көхтөөх күрэх ааста. Элбэх «ыалдьааччылаах», кыайыыга дьулуһуу күүрээннээх күрэх түмүгэр түөлбэлэр кыайыы кынаттанан, кыайыылаахтар түөстэрэ мэтээлинэн килбэйэн, ураты көрдөрүүлээхтэр анал бириискэ тиксэн санаалара көннүөрдьэ.
Саас сааһынан сырдатар буоллахха маннык. Түөлбэнэн күрэххэ Альбина Егорова салайааччылаах «Күөх кытыл» түөлбэ спортсменнара бастаан таҕыстылар уонна XX-с үйэҕэ республикаҕа биллибит хайыһардьыт Е.Е.Эверстов ыччаттарыттан харчынан бириис туттулар. Иккис миэстэ минньигэс амтанын Наталья Обутова салайааччылаах «Ворошилов» түөлбэ биллэ. Бу түөлбэҕэ анал бирииһи анаатылар 1954-56 сс. республикаҕа хайыһар күрэхтэрин кыайыылааҕа И.В.Захаров ыччаттара. Онтон үһүс миэстэни Марианна Гуляева салайааччылаах «Тайылаахы» түөлбэ ситистэ. Бу түөлбэҕэ Саха сирин хайыһардьыт студеннарын хамаандатын чилиэнинэн сылдьыбыт М.И.Сметанина ыччаттарыттан анал бирииһи түөлбэ хамаандатын хамандыыра Аполлон Гуляевка туттардылар. Түөлбэҕэ Е.Е.Эверстов ыччаттара анал бириистэрин туттаран үөрүүнү үксэттилэр.
Ветеран спортсмен Е.А.Павлов анал бирииһин 50-тан үөһээ саастаахтарга бастаабыт Агафья Евелева уонна Сергей Семенов ыланнар махталларын тиэртилэр.
Биирдиилээн ситиһиилэри көрдөххө маннык буолла.
Оскуола оҕолоругар кыргыттарга:
1 миэстэ — Обутова Карина («Ворошилов» түөлбэ);
2 миэстэ — Левина Алиана («Күөх кытыл»);
3 миэстэ — Софронеева Эвелина («Сайдам»).
Уолаттарга:
1 миэстэ — Сыроватский Алеша («Сарыал»);
2 миэстэ — Харлампьев Альберт («Тайылаахы»);
3 миэстэ — Иванов Олег («Ворошилов»).
Дьахталларга:
1 миэстэ — Пермякова Варвара («Хатыҥ Чараҥ»);
2 миэстэ — Дьяконова Пелагея («Тайылаахы»);
3 миэстэ — Федотова Мария («Күөх кытыл»).
Эр дьоҥҥо:
1 миэстэ — Левин Тимофей («Күөх кытыл»);
2 миэстэ — Гуляев Аполлон («Ворошилов»);
3 миэстэ — Кривошапкин Валерий («Сарыал»).
Бэтэрээннэр ыккардыларыгар:
1 миэстэ — Евелева Агафья Денисовна,
2 миэстэ — Андреева Ирина Васильевна
Эр дьоҥҥо:
1 миэстэ — Семенов Сергей Николаевич,
2 миэстэ — Кононов Иван Петрович,
3 миэстэ — Строев Александр Владимирович.
Чөл олоҕу күөрэччи тутар көхтөөх тэрээһини тэрийэн ыыттылар Т.С.Левин директор эбээһинэһин толорооччулаах оҕо спордын оскуолата. Тимофей Савельевич уонна тэрилтэ кэллэктиибэ хайыһар спордын дьоро күнүн тэрийиигэ анал бириистэри туруорбут бастыҥ хайыһардьыттар ыччаттарыгар махталларын тиэртилэр.
Хайыһар курдук үйэлэри уҥуордаан кэлбит спорт бастыҥ күрэҕин күнэ өрө күүрүүлээхтик тэриллэн ыытылынна.
Татьяна Максимова-Лазарева