Тохсунньу ыйга тахсыбыт Арассыыйа Бэрэсэдьиэнин Владимир Путин уурааҕыгар олоҕуран бүтүн дойду үрдүнэн сэрии бэтэрээннэрин ааттарын үйэтитэр сыаллаах кинилэр олорор, олорон ааспыт дьиэлэригэр анал өйдөбүнньүк бэлиэлэри түөлбэ салайааччыларыгар түҥэтии Кэбээйи нэһилиэгэр ыытылынна.
Ол курдук, төрүт олохтоох бэтэрээннэр ааттарын чуолкайдыыр анал хамыыһыйа тэриллибитэ. Манна олохтоох дьаһалта үлэһиттэрэ, нэһилиэк бэтэрээннэрин сэбиэтэ, сүбэ буолар аҕам саастаах дьоннор киирбиттэрэ. Кинилэр Улуу Кыайыы 70 сылын көрсө тахсыбыт «Ийэ дойду көмүскэлигэр» кинигэҕэ киирбит испиэһэккэ олоҕурдулар. Бу сыралаах үлэ түмүгэр Кэбээйи нэһилиэгин 79 сэрии бэтэрээннэрэ олоро сылдьыбыт дьиэлэригэр ыам ыйын 9 күнүн көрсө бу бэлиэлэр ыйаныахтара. Кинилэр оҥорбут хорсун быһыылара оҕолоругар, сиэннэригэр, хос сиэннэригэр өйдөбүнньүк буолан сыдьаайыа.
Светлана Оконешникова