«Өбүгэ үгэһин сөргүтүү» бөлөх эбэлэрэ Кэбээйитээҕи кыраайы үөрэтэр түмэлигэр бииргэ үлэлэһэр Саргылаана Семёновна Кривошапкина салайар 2 «а» уонна Марина Петровна Ноговицына салайар 6 «а» кылаастарга Кыайыы күнүгэр аналлаах кылаас чааһын ыытыстыбыт.
Ыам Ыйа — Иэйиэхсит Айыы ыйдааҕы сиэрин-туомун туһунан Валентина Иннокентьевна Павлова кэпсээтэ. Иэйиэхсит ыйын дьайыыта – ыраастаныы, арчыланыы. Ыраастаныы сиэринэн үөрэ отун буруотунан уонна хатыҥ мас лабаатыттан оҥоһуллубут алтан чуорааннаах, үрүҥ сылгы сиэллээх дьалбыырбынан арчылаабыппар, оҕолор «Сайын сыта!» — дэһэ-дэһэ, илиилэринэн бэйэлэригэр тардынан, от сытын эҕирийэн ылан, дуоһуйа ылыммыттарыттан үөрдүм.
Иэйиэхсит Айыы мааны аһа саламаат буолар. Эбээ Февронья Ивановна Кокорева буоламмыт минньигэс бэйэлээх сылаас саламаатынан оҕолорго уонна ытык ыалдьыттарбытыгар күндүлээн амсаттыбыт.
Дьэ, ол кэннэ оҕолорго, ыҥырыылаах ыалдьыттарбыт нэһилиэкпит ытык кырдьаҕастара төрүт культураҕа, фольклорга угуйааччы, алгысчыт Савелий Николаевич Тимофеев –Ыллык уонна ветераннар кулууптарын салайааччыта, түмэлгэ өр сылларга директордаабыт Егор Авксентьевич Павлов Кыайыы күнүн суолтатын кэпсээтилэр, бырааһынньыгынан эҕэрдэлээтилэр. Сэрии оҕолоро буоланнар Аҕа Дойду сэриитин кэмигэр аас-туор олох түгэннэрин ахтан-санаан аастылар. Кэбээйигэ Чурапчыттан балыктааһыҥҥа көһөрүллүбүт ыар дьылҕалаах гынан баран, кэлин манна олохсуйан, ыал буолан, элбэх оҕолонон, сиэннэнэн, тэнийэн, дьоллоох олоҕу уһансыбыт эбэлэрин олоҕун Татьяна Семёновна Иванова кэпсээн сырдатта. Онтон мин Аҕа Дойду сэриитин уонна үлэ ветерана аҕам К.А. Дьяконов туһунан кылгастык ахтыы оҥордум.
Ол кэннэ Саргылана Семеновна салайар 2 «а» кылааһын оҕолоро ыалдьыттарыгар анаан «Элик Үтүөтэ Эрдьигэн Бэргэн» олоҥхоттон уобарастарынан үллэстэннэр быһа тардыыны толордулар, норуот ырыатын ыллаатылар, хомустаатылар уонна Т.Е. Сметанин хоһооннорун ааҕаннар ыалдьыттарбыт Савелий Николаевич уонна Егор Авксентьевич сүргэлэрин сүрдээхтик көтөҕөн, үөрдэн-көтүтэн, бэйэлэрэ оҥорбут аккырыыккаларын, сэбиэскэй бэлиэлээх минньигэс торду уонна Кыайыы чороонун бэлэх ууннулар.
Түмүккэ Саввелий Николаевич бэйэтэ астаабыт алаадьытын, быыппаҕын уонна минньигэс ас кэһиилэнэн кэлбитин фуршеттаан аһаан, түмэлбит араас экспонаттарыгар хаартыскаҕа түһэн астынан тарҕастылар.
Елизавета Софронеева – Ил Ииһэ,СӨ норуотун маастара