Бүгүн эйэлээх, нус-хас олох туһугар олохторун толук биэрэллэрин кэрэйбэтэх дьоммутугар махтаныы, сүгүрүйүү күнэ.
Бу күн Кэбээйи нэһилиэгин «Мичээр» оҕо сайдар киинигэр анал дьайыы бэтэрээннэрэ, убайдыы бырааттыы Петр уонна Алексей Обутовтар ааттарын үйэтитэр сыаллаах тэрээһин буолла.
Петр Петрович программист, радиомеханик идэлээҕэ. Онтон Алексей Петрович суоппар идэлээҕэ. Уолаттар иккиэн ураты дьоҕурдара техника өттүгэр буоларын нэһилиэк олохтоохторо чахчы билэрбит. «Технарь — это человек предрасположенный к математике, физике, может починить пылесос и стиральную машину, знает как устроен двигатель и т. п. Это предрасположенность которая дана каждому от Природы, от Бога…» диэн куйаар эйгэтигэр суруллар.
Убайдыы бырааттыы Обутовтар сырдык кэриэстэригэр тэрээһин ураты толкуйдаах оҕолор оҥорон, таҥан таһаарыыларын күөдьүтүү, өссө дириҥэтэн сайыннарар сыаллаах ыытылынна. Уонна оҕолор биир дойдулаахтарын хорсун быһыыларыгар сүгүрүйүүнү, кинилэр ааттарын үйэтитэргэ болҕомтону хатааһыны, кинилэринэн киэн туттууну, патриотическай өйү-санааны чиҥэтэр сыаллаах — соруктаах буолла.
«LEGOROB» күрэх кыттааччыларынан буоллулар «Мичээр» оҕо сайдар киинин улахан уонна бэлэмнэнии бөлөҕүн иитиллээччилэрэ, Кэбээйи орто оскуолатын 1-2 кылааһын үөрэнээччилэрэ. Тэрээһиҥҥэ ыҥырыылаах ыалдьыттар нэһилиэк баһылыга И.И. Левин, бэтэрээннэр сэбиэттэрин бэрэсэдээтэлэ Е.А. Павлов, Петр уонна Алексей үөрэппит учууталлара, кылааһынньыктара, чугас аймахтара долгутуулаах тыллары эттилэр. Дьоруойдар күннэринэн эҕэрдэлээтилэр.
Парад, өрөгөй ырыатын кэнниттэн Петр уонна Алексей кылгас олохторун туһунан видео көһүннэ, мүнүүтэ чуумпуруу буолла. Салгыы оҕолор күрэхтэрэ, выставка арылынна.
Күрэхтэһии икки номинациянан, ол эбэтэр «Собери мусор» уонна «Собери по инструкции», буолла. Уолаттар түргэн-тарҕан, чопчу-чуолкай уонна сыыдам оҥоһууларынан көрөөччүлэргэ хаамар, сүүрэр роботтары оҥорон таһааран көрдөрдүлэр. Сүбэ быһаарыытынан уһуйаан оҕолорун ыккардыгар «Собери по инструкции» номинацияҕа Полятинскай Ваня уонна Васильев Данил бастаан таҕыстылар. Онтон «Собери мусор» номинацияҕа Сметанин Максим 44 сөкүүндэнэн бэриллибит сорудаҕы толорон бастаата.
Оскуола үөрэнээччилэрин ыккардыгар «Собери по инструкции» номинацияҕа Левин Артем уонна
Кононов Иван бастаан таҕыстылар. «Собери мусор» номинацияҕа Степанов Саян бастакы миэстэни ылла.
Күрэххэ элбэх номинациялар, бириистэр туттарылыннылар.
Дьэ манан анал дьайыы бэтэрээннэрин Петр уонна Алексей Обутовтар сырдык ааттарын үйэтитии биир бэлиэ тэрээһинэ үгүс оҕону-аймаҕы, уопсастыбаннаһы түмэн сэргэхтик ааста.
Татьяна Максимова-Лазарева