Арҕас сэлиэнньэтигэр кыһыҥҥы суол ааһар уулуссаларыгар – саҥа уот ситимэ холбонно. Уопсайа 3 км уһуннаах 46 лаампалаах остуолба турда.
Сэлиэнньэ иһинэн ааһар кыһыҥҥы айан суола сырдык, тупсаҕай көстүүлээх буоларыгар, уот тардылларыгар үгүс үлэ барбытын «Куокуй нэһилиэгэ» тыа сирин түөлбэтин баһылыга Лев Николаевич Павлов бэлиэтиир :
“Нэһилиэкпит иһинэн ааһар региональнай суолталаах кыһыҥҥы айан суолун сырдатыы үлэтэ кулун тутар 28 күнүгэр силигэ ситэн түмүктэннэ. Өр кэм устата туруорсан, дьаныһан үлэлэһэн, туруоруммут сыалбыт-сорукпут толору ситэн, былааннаммыт үлэбит туолбутуттан бары да үөрдүбүт, сэргэхсийдибит. Бу нэһилиэкпитигэр сайдыы биир суола буоларын бэлиэтиибит. Күһүҥҥү хараҥаҕа, кыһыҥҥы тымныыга уулусса уота тыын боппуруос буолара саарбаҕа суох.
Тус махталбытын улууспут аҕа баһылыгар И.И. Левиҥҥэ, урбаанньыт А.И. Васильевка, үлэни иилээн-саҕалаан ыыппыт уолаттарбытыгар тиэрдэбит».
Надежда Илларионова