Бу күннэргэ өрөспүүбүлүкэ бары улуустарыгар күргүөмнээх от үлэтин үгэнэ. Бааһынай хаһаайыстыбалар, биирдиилээн дьон тымныы кыһыны эрэйэ суох туоруур туһугар элбэх оту оттуурга дьулуһаллар, оҕолуун-уруулуун бука бары ходуһаҕа тахсаллар.
Бүгүн улууска оттооһун хаамыытын, сүөһү төбөтүн ахсаанын туһунан тыа хаһаайыстыбатын салалтатын салайааччытын Гаврил Гаврильевич Селляховы кытта кэпсэттибит.
— Дорообо, Гаврил Гаврильевич. Кэбээйи улууһугар сүөһү төбөтүн ахсаана төһөнүй, оттооһун хаамыыта хайдах баран иһэрий?
Кэбээйи улууһугар быйылгы оппут былаана 10 176 туонна. Быйылгы сылга оттонор ходуһаларга от үүнүүтэ ортотунан сыаналанар.
От ыйын 25 күнүн түмүгүнэн улуус үрдүнэн 1 341 туонна от оттонно, ол 13-14 %-ҥа тэҥнэһэр. Улуус үрдүнэн 353 киһи, 72 тиэхиньикэ, 170 звено, ол онтон 18-һа механизированнай, 3 ат, 77 илии күүһүнэн оттуу сылдьаллар.
Барыта холбоон Кэбээйи улууһун үрдүнэн 5 381 ынах-сүөһү ахсаана баар. Ол онтон 1 931 ыанар ынах. Быйылгы сылга 1 335 ньирэй төрөөтө. 3 694 сылгы, онтон биэтэ 1 866. Бу дьылга 709 кулун төрөөтө, 134 сибиинньэ, 8 252 төбө дьиэ табата, 1 790 көтөр, куурусса, хаас, индюк онно киирэллэр.
Забой кэнниттэн барыллаан эттэххэ, кыстыкка 4 450 төбө ынах-сүөһү, 3 300 сылгы киириэхтээх.
Ааспыт нэдиэлэҕэ “Ворошилов” бааһынай хаһаайыстыбатыгар сылдьыбытым. Онно тиэхиньикэ өрөмүөнэ, окко киириигэ бэлэмнэнии үлэтэ ыытылла турар. Кыра, арҕааҥы, Тыайа диэки сытар сирдэри оттоон бүтэрбиттэр. Билигин Турбаахы эбэҕэ киирээри бэлэмнэнэ сылдьаллар. Бу нэдиэлэ ортото бары звено киирэн оту оттуохтаах. “Ардах түспэккэ халлаан туран биэрэрэ буоллар түргэн соҕустук былааммытын толоруохтаахпыт”, – диэн баҕа санаалаахтар отчуттар.
Биир улахан хаһаайыстыбабыт, СХПК “Сайылык” эмиэ быйылгы былаанын толорор сыаллаах оттуу сылдьар. Куокуй өттүгэр бааһынай хаһаайыстыбалар эмиэ кыралаан оттуу сылдьаллар. Халлаан туран биэрдэҕинэ, тиэхиньикэлэр этэҥҥэ үлэлээтэхтэринэ, былаан туолуохтаах. Оройуон үрдүнэн ЛПХ кыракый чааһынай хаһаайыстыбалар оттообуттара быданнаата.
Бу күннэргэ биһиэхэ СӨ тыа хаһаайыстыбатын министиэристибэтин аска уонна оҥорон таһаарыыга отделын салайааччыта Егор Владимирович Чичигинаров кэлэн, үлэҺиттэри кытта көрсөн, кэпсэтэн, сүбэлээн, хайдах үлэлии сылдьалларын көрөн-истэн барда. Чичигинаров Е.В. кытта министиэристибэттэн Майя Гуляева уонна Константин Максимов кэлэннэр, бааһынай хаһаайыстыбалары кытта мунньахтаан, туох кыһалҕалаахтарын, туох саҥаны киллэриэхтээхтэрин, баҕа санааларын истэн, сүбэлээн бардылар. Кинилэргэ биһиги үлэбитин кэлэн көрөн-истэн, сэһэргээн барбыттарыгар барҕа махталбытын тиэрдэбит.
Түмүккэ этиэм этэ, Кэбээйи улууһун олохтоохторугар, эрчимнээх эдэр ыччаппытыгар,өбүгэ саҕаттан илдьэ кэлбит сүрүн дьарыкпытын ыҺыктыбакка, хонуу муҥунан хороҕор муостаахпытын, сыһыы муҥунан сыспай сиэллээхпитин дэлэтэн иһиэххэйиҥ диэн.
Интервью — Анна Ионова