Кэбээйи мааны сиригэр ыһыллыбыт Олоҥхо ыһыаҕыттан улахан астыныыны, дуоһуйууну уонна уостубат күүстээх өйдөбүлү ылан кэллим!
Бу кырдьык даҕаны Сахабыт сирин историятыгар көмүс буукубаларынан суруллар, ураты үрдүк таһымнаах дьоро түһүлгэ ыытылынна. Бу ыһыахха бэйэм харахпынан көрбүт уонна сүрэхпинэн билбит ураты түгэннэрбин үллэстэбин. Олортон биирдэстэрэ буолар — сахалыы таҥас: ыһыах түһүлгэтигэр сылдьан дьон-сэргэ сахалыы таҥаһын-сабын маанытын, уратытын уонна кэрэтин көрөн астынным, улаханнык сэргээтим. Хас биирдии киһи бэйэтин таҥаһыгар саха кутун, үгэһин ууран туран айбыта,тикпитэ киһи хараҕар тутатына быраҕыллар, ону таһынан аныгылыы көрүүлээх, моһуоннаах таҥастар бааллара уратытык уонна сэргэхтик көстөр этэ.
Ыһыахха хас биирдии саха киһитигэр өссө биир күүтүүлээх түгэн Күн көрсүүтэ буолар. Саҥа күнү, сырдыгы уонна айылгыны уруйдуур ытык Күн көрсүүтүн сиэригэр-туомугар кыттан, кэлэр сылга күүс-сэниэ ылынан олус дьоллоохпун.
Кэбээйигэ араас сир муннуктарыттан эпостары толорооччулар ыҥырыллан кэлбиттэрэ улахан сонун буолла. Кинилэр ураты куоластарын, норуоттарын улуу нэһилиэстибэтин ис сүрэхтэн истэн, дууһалыын байдым диэххэ сөп.
Бу Олоҥхо ыһыаҕа миэхэ ураты суолталаах буолла! Бэйэм олоҥхону испиктээк быһыытынан толорууга Николай Петрович Бурнашев-Боодоҕос «Кыыс Дэбилийэ» олоҥхотуттан бухатыыр кыыс оруолун бастакыбын соҕотох олоҥхону толорууга холонон көрдүм уонна дьүүллүүр сүбэ сыанабылын ылан, анал аат ылбытым. Бу дьоһуннаах бэлиэ туоһу уонна үрдүк аат үөрүүбүн өссө күүскэ үксээтэ, саҥа айар үлэҕэ кынаттаата!
Бу Олоҥхо ыһыаҕын тэрийбит Кэбээйи улууһун салалтатыгар, олохтоохторугар уонна бары кыттыылаахтарга улахан барҕа махтал!
Алина Герасимова, Дьокуускай куорат