Ийэлэр күннэригэр түбэһиннэрэн общественнай организациям үлэтин чэрчитинэн, эдьиийбинээн Марина Христофоровналыын Кэбээйи улууһун Кэбээйи нэһилиэгэр тиийэн, «Таастаах Дьааҥыттан эҕэрдэ» диэн түһүлгэни тэрийэн ыыттыбыт.
11 чаастан чөл олоҕу пропагандалыыр төгүрүк остуол тула кэпсэтии, санаа атастаһыы сүрдээх үрдүк таһымнаахтык буолан ааста. Манна общественнай түмсүүлэр салайааччылара,нэһилиэк депутаттарын советын председателя, «Сандаара» түмсүү салайааччыта К.А. Терехова, «Күбэйэ» эбэлэр уонна «Оһуор Тойуга» түмсүүлэр сал. Е.К. Софронеева, социальнай педагог, оройуон үөрэҕириитин профсоюһун председателя И.В. Винокурова-Андреева, балыыһа терапевт бырааһа Л.П. Стручкова, наставник, ветеран учуутал Д.С. Кокорева кыттыыны ыллылар. Бэйэлэрин санааларын этэн туран аһаҕас кэпсээтилэр буоллулар, баҕа санааларын тиэртилэр.
Киэһэтигэр «Таастаах Дьааҥыттан эҕэрдэ» диэн ырыа куттаах, хоһоон аргыстаах түһүлгэ буолан ааста. Бу түһүлгэ үс түһүмэҕинэн буолан ааста. Бастакы түһүмэх — «Дьааҥы фольклора» эбэбит Мария Николаевна Слепцова (Кустуй Маарыйа) ыллаабыт былыргы дьааҥылыы матыыптара; хабарҕа, мурун, таҥалай, дьааҥылыы тойук ылланнылар, иккис «Хоһоон хонуута», манна киирдилэр Алампа «Төрөөбүт дойду», Былатыан Ойуунускай «Таатта оҕото Дьарылыктыйа Былатыан», Дьааҥыттан тахсыбыт поэттар: М. Ефимов, Ст. Юмшанов, В. Стручков, В. Дедюкин, Х. Горохов хоһоонноро ааҕылыннылар. Үһүс түһүмэх — «Ырыа олоҕум аргыһа». Манна Марина Христофоровна бэйэтин айбыт мелодияларыгар ырыаларын ыллаата. Дьон сэргэ сүрдээҕин сэргээтэ, ытыс тыаһынан доҕуһуоллаата. Саха чулуу уолаттарын ааттара ааттанна, өбүгэ ырыата ылланна.
Манна СВО ийэлэрин чиэстээһин ыытылынна. Кэбээйиттэн 26 оҕо СВОҕа ыҥыраллан барбыт эбит. Республикаҕа «Илии сылааһа» ийэлэр, эбэлэр иистэнэр сыахтарын салаатын тэрийэн үлэлэтэн эрэллэриттэн наьаа үөрдүбүт. Бэл диэтэр СВОҕа сылдьар оҕолор ийэлэрэ кыттыспыттара долгутта.
Кэбээйилэр наһаа истиҥник көрүстүлэр, махтал маанытын анаатылар. Бүтэһигэр «бу курдук республиканы кэрийэ сылдьан маннык түһүлгэлэри тэрийэнҥҥит дьону сэргэни уһугуннарыҥ, сэргэхситиҥ» диэн ветеран учуутал Д.С. Кокорева алгыс тыла сөптөөх хардыыбыт туоһута буолла. Дьааҥыттан төрүттээх, удьуор хаан тардыылаах Кэбээйигэ олохсуйбут, Кэбээйи улууһун, нэһилиэгин бочуоттаах олохтооҕо, СӨ культуратын туйгуна, СӨ Норуотун маастара Елизавета Константиновна, дьиэ кэргэн аҕа баһылыга Николай Петрович сахалыы балаҕаннарыгар хонон, өрөөн, сахалыы сибиэһэй аһы аһаан, көмүлүөк оһох сылааһынан угуттана арчыланан, алгыстанан, олохтоох нэһилиэнньэ махталын ылан, сырдыгынан сыдьаайан, ырааһыран , чэпчээн бардыбыт.
Нэһилиэк олохтоохторугар сылаас истиҥ сыһыаҥҥытыгар, сэргээн истибиккитигэр махтанабыт, баҕарабыт баҕа санааларгыт барыта салаллан истин, үлэҕит таһаарыылаах буоллун, тулаҕыт сырдыгынан, сылааһынан илгийдин, саха буолан сандаарыҥ, киһи буолан килбэйиҥ, оҕолоргут, ыччаттаргыт кэскиллээх буоллуннар, кырдьаҕастан сүбэтин ылан тэрийэр үлэҕитигэр сыһыары тутан, түмсэн, сайдар аартыккыт арыллан истин! Этэҥҥэ буолууну баҕардахпыт буоллун!
Дьааҥы Далбар хотуттара Клавдия Христофоровна Попова, Марина Христофоровна Васильева
