История учуутала, музейбытын төрүттээбит П.Д. Степанов салайыытынан, 1957-1958 сс. “Эдэр историк“ куруһуок чилиэнэ 8 “а”кылаас үөрэнээччитэ Филипп Петров Кэбээйи историятын чинчийэр үлэлэрин таһаарбыт.
Куруһуок чилиэттэрэ 8 илииннэн таһаарбыт “Эдэр историк» 2-с нүөмэригэр кини 17 чинчийбит үлэтэ киирбиттэр. Ол курдук:
1.Уолбут уруккута.
2.Оройуон центрын уруккута.
3.Сир үллэһигэ. Кэбээйи, Тыайа, Мукучу, 1, 2 Лүүчүннэр нэһилиэктэрэ Уус-Бүлүүгэ холбонуулара.
4.”Сэппэрээк” төрүттэниитэ.
5.”Кыһыл хотуур” диэн Д.О.З. тэриллиитэ.
6.”Култуураҕа” таҥара куолакалын уһулуу.
7.”Калинин” колхоз тэриллиитэ.
8.”Туордааһын”.
9.”Ытыныы”
10.Кэбээйигэ үөрэхтээһин саҕаланыыта.
11.Сааттаах быһыы.
12.Кэбээйи оройуонун олохтонуута.
13.Остуорас үлэтэ.
14.”Калинин” колхоз бөһүөлэгин олохтонуута.
15.Колхоз үлэтэ-хамнаһа.
16.Николай Федотович Кобяков.
17.Яков Герасимович Сметанин.
“Эдэр историк” куруһуогун чилиэттэрэ суруйан таһаарбыт 8 сурунаалларыттан сэттэтэ музейбытыгар хараллан сыталлар.
Ити кэмнэри Филипп Данилович “Ааспыты ахтыы” бастакы кинигэтигэр суруйар: Петр Денисович биһиэхэ – “Кэбээйи музейын төрүттүөхпүт, онно материалы эһиги хомуйуохтааххыт” диэбитэ. Куруһуок оҕолоро бары өрөбүлбүтүгэр, сайыҥҥы сынньалаҥмытыгар кыһанан туран дьарыктанарбыт. Мин өрөбүлүм аайы Калинин колхуос кырдьаҕас дьонун көрсөн, ыйыталаһан, туоһулаһан, кумааҕыга тиһэр этим. Ол үлэбин бүтэрэн оскуоланы бүтэрэрим саҕана, саҥа тэриллибит музейга туттарбытым.
Аҕыйах хонуктааҕыта 87 саастаах Дьокуускай куоракка олорор музейбытын 1958 с. төрүттэспит Филипп Данилович Петров музейбытыгар 13 биллиилээх историяҕа киирбит дьоннор статуэткаларын, бюстарын уонна 22 историяҕа биллэр дьоннор тустарынан кинигэлэри экспонат быһыытынан бэлэх уунна.
Ити курдук Филипп Данилович музейбытын тэрийсибитэ 67 сыл буолан баран, бэлэх туттаран бэйэтин аатын үйэтиттэ, хас биирдии экспонатыгар аатын суруйан бэлиэ хаалларда. Экспонаттары олохтоммут докуменнарга олоҕуран илии баттаан туттубут, бары туруктара үчүгэй.
Музейбыт уонна Россия музейдарын каталогар бэлэхтэммит экспонаттар киирдилэр, биир анал витринаҕа көрдөрүүгэ туруорулуннулар.
Филипп Даниловичка уонна кэргэнэ Зинаида Николаевнаҕа музейбыт коллектива махталбытын тириэрдэбит.
Григорий Егоров, П.Д. Степанов аатынан Кэбээйитээҕи кыраайы үөрэтэр музей директора