Сааскы доҕордоһуу Саас, Эйэ, Үлэ бырааһынньыгынан Сииттэбит нэһилиэгин «Дьүкээбил» түөлбэ олохтоохторо биир киһи курдук түмсэннэр айылҕаҕа тахсан сынньанан, Күөх Маайы көрсөн киирдилэр.
Түөлбэ салайааччыта Агафья Николаевна Дьяконова түөлбэтин олохтоохторун түмэр, сомоҕолуур сыалтан бу маннык тэрээһини тэрийбитэ үтүө холобур буолар. Бу күн айылҕаҕа сүгүрүйэн, харалдьыкка үктэмиччэ уһун кыһыны этэҥҥэ атааран Күөх Маайы көрсө сирбитин -уоппутун алаадьылаах арыынан айах туттубут. Сэбиэскэй кэми ахтан -санаан кэнсиэрбэлээх, сүөгэйдээх борщ астанна, аныгы дьон сиэринэн минньигэс шашлыгы тото-хана сиэтибит. Түөлбэбит салайааччыта Агафья Николаевна сүүрүүлээх- көтүүлээх оонньуу арааҥын онньотто, итини таһынан лотерея оонньонон бары бириис тутан үөрүүбүт үксээтэ.
Ол курдук «Сыал ытааһыныгар» кыайыылааҕынан Александра Иванова абсолютнай чемпион аатын ылыан ылла. Викторина боппуруостарыгар сөптөөх хоруйу эппиэттээн Яна Оконешникова кыайыылааҕынан таҕыста. Хамаанданан күрэххэ бары көхтөөхтүк оонньоон кыайыы өрөгөйүн ыллылар. Түөлбэбит саастаах олохтоохторо, үлэ бэтэрээннэрэ Матрёна Семёновна Колмогорова, Надежда Григорьевна, Николай Герасимович Ермолаевтар, Мария Степановна Обутова, Валентина Степановна Обутова, Егор Егорович Лебедев, Николай Дьяконов эдэрдэртэн хаалсыбакка тэҥҥэ сүүрэн-көтөн, оонньоон эдэр саастарын санаан ыллылар.
Кылгастык түөлбэбит олоҕуттан билиһиннэрдэххэ манна олорор эдэр ыаллар ийэлэрэ, аҕалара нэһилиэкпит олоҕор өрүү көхтөөхтүк кытталлар.
Быйыл улууспутугар Олоҥхо ыһыаҕа ыытылларынан сибээстээн түөлбэбит эдэр ийэлэрэ: Анастасия Сидорова, Анастасия Парникова, Софья Николаева, Александра Иванова, Дайана Охлопкова, Лена Новгородова, Наталья Павлова, Татьяна Максимова, Татьяна Новгородова, Агафья Дьяконова уонна Яна Оконешникова биэс дьэрэкээн чаппарааҕы тиктилэр. Түөлбэбит олохтоохторун аатыттан махталбытын тиэрдэбит.
Соторутааҕыта ыытыллыбыт «Чөл олох — доруобуйа төрдө» диэн түөлбэлэр икки ардыларыгар ыытыллыбыт спортивный спартакиадаҕа күүстээх күрэх түмүгүнэн бастакы миэстэни «Дьүкээбил» түөлбэ ылан, анал кубогынан уонна добун суругунан наҕараадаламмыта. Агафья Николаевна дьонугар- сэргэтигэр быйылгы үлэ былаанын торумнаата уонна түөлбэ түһүлгэтин ситэрэн- тупсаран оҥоруу үлэтэ ыытылларын туһунан билиһиннэрдэ.
Ити курдук бырааһынньыктааҕы күнү бэрт сэргэхтик атааран, дуоһуйа сынньанан кэллибит. Түөлбэбит салайааччытыгар Агафья Николаевнаҕа уонна суоппардарыгар Егор Лебедевка, Александра Ивановаҕа, Анастасия Сидороваҕа махталбытын тиэрдэбит.
Барыгытыгар кытаанах доруобуйаны, ситиһиилэри баҕарабыт. Өссө да нэһилиэкпит, түөлбэбит туһугар түмсүөҕүҥ, үөрэниэҕиҥ, үлэлиэҕиҥ, олоруоҕуҥ.
Мария Обутова, Сииттэ нэһилиэгэ.