Мукучубут нэһилиэгэр «Күүстээхпин, кыахтаахпын…» кыра саллааттар күрэхтэрэ 10 төгүлүн тэрилиннэ. Быйылгы күрэххэ сэттэ кыра саллаат кыттыыны ылла. Уолаттарбыт 6 тургутар түһүмэҕи аастылар. Ол курдук бириэмэҕэ байыаннай таҥаһы таҥныы, сиртэн анньыныы, тимэх тигии, корнхолга сыалы табыы, хомуур оонньууга кубик хомуйуу уонна минньигэс түһүмэх хааһы сиэһинэ.
Кыра саллааттар бастакы сүһүөххэ уһуйаан уонна 1 кылаас уолаттара Чириков Артем — 1 кылаас, Стрекаловский Дьулуур, Андросов Мирон — «Кэнчээри» уһуйаан иитиллээччилэрэ, иккис сүһүөххэ 2-4 кылаас уолаттара Унаров Сеня, Андросов Костя — 4 кылаастан, Елисеев Дамир — 3 кылаастан, Иванов Саша — 2 кылаастан күөн көрүстүлэр.
Күүстээх, кыахтаах күрэх түмүгэр бастакы сүһүөххэ Артем Чириков, иккис сүһүөххэ Костя Андросов кыһыл көмүс мэтээли түөстэригэр кэттилэр, күлүмүрдүү оонньуур кубогы илиилэригэр өрө уунан кыайыы өрөгөйүн биллилэр.
Быйылгы үбүлүөйдээх тэрээһиҥҥэ 3 нүөмэрдээх Баһаарынай чаас начальнига Сергей Семенович Каратаев, Сангартан Кэбээйи улууһун депутата Анна Гаврильевна Ионова, «Дайан» норуот айымньытын дьиэтин салайааччыта Каролина Борисовна Кудрина, «Мукучу нэһилиэгэ» тыа сэлиэнньэтин дьаһалтата уонна оҕолор олорор түөлбэлэриттэн бэртээхэй бэлэхтэри утары уунан оҕолор үөрүүлэрин үксэттилэр. Маны таһынан күрэх көрөөччүлэригэр анаммыт бэлэҕи «Саамай көхтөөх кылаас» аатын 2 кылаастар бүтүн кылааһынан кэлэн бииргэ үөрэнэр доҕордоругар күүстээх өйөбүл, тирэх буолбуттара хайҕаллааҕын бэлиэтээн анал бэлэҕи ыллылар. Оҕолорбут үөрүүлэрин үксэппит үбүлүөйдээх сылбыт спонсордарыгар махтанабыт!
Бэртээхэй тэрээһиҥҥэ кыра саллааттары эҕэрдэлээн ырыа бэлэхтээх кэлбит «Кэнчээри» уһуйаан иитиллээччилэригэр, күрэххэ кытыннарарга күүс-көмө буолбут кылаас, уһуйаан салайааччыларыгар махталбыт муҥура суох.
Инникитин даҕаны бу курдук уолаттарбытын эр хоһуун санааларын бөҕөргөтөргө, чэгиэн туруктаах, бигэ тирэхтээх, кыра эрдэхтэриттэн дойдуга бэриниилээх буола улааталларыгар күүс-көмө буолан маннык тэрээһиннэри тэрийэн иһиэҕиҥ диэн ыҥырабыт. Кырачаан саллааттарбытыгар дэгиттэр дьарыктаах, туйгун үөрэхтээх, булугас, мындыр өйдөөх дьоһун дьон буола улааталларыгар баҕарабыт!
Вера Прокопьева, Мукучу