Өрөспүүбүлүкэтээҕи «Илии сылааһа» иистэнэр сыах үлэһиттэрэ Куокуйга командировкаҕа сырыттылар.
Нам, Хаҥалас улуустарын кэнниттэн Кэбээйигэ, Куокуйга сүрүн иистэнньэҥнэр Рожина А.Г., кураторбыт Сметанина А.Н. кэллилэр. Хаһан да биһиги улууска айаннаабатах суоппар Еремин Евгений Владимирович сымнаҕастык айаннатан илдьэ сырытта. Сүрүн сыалларынан филиаллар үлэлиир усулуобуйаларын, туох кыһалҕалаахтарын көрүү-истии, иискэ көмөлөһүү буолар.
«Илии сылааһыттан» ыалдьыттар: сүрүн иистэнньэҥ Рожина А.Г., суоппар Еремин Е.В., иистэнньэҥ Сметанина А.Н.
Айталина Гаврильевна флис матырыйаалынан халыҥ куурканы тигиигэ маастар-кылаас ыытта. Иистэнньэҥнэр ньэмиэти быһыыга ыарырҕаталлар, онно сүбэлээн, ыйан-кэрдэн биэрдэ.
Улуус салалтатын сыллааҕы отчуотун кэмигэр баһылык Иван Левин Куокуйга кэлэ сылдьан, анал байыаннай дьайыыга анаан иистэнэр Татьяна Еремеева салайааччылаах «Надежда» холбоһук үлэлиир хоһугар киирэн көрсүбүтэ, үлэ хаамыытын билсибитэ. Уонна промышленнай массыына атыылаһарга 100000 солк. аныыбын диэн, илии тутуһан барбыта. Аҕыйах кэм иһигэр иистэнньэҥнэр баҕа санаалара туолла. Киирбит үбүнэн Дьокуускайтан «Остров Сокровищ» маҕаһыынтан «Aurora A-4EH», «Aurora A-2N» массыыналары, остуолларын, «Aurora RC-70» дисковай быһах атыыластылар. Өрөспүүбүлүкэтээҕи иистэнэр «Илии сылааһа» сыах салайааччыта И.Е. Саввина атыылаһыллыбыт тэриллэри командировкаҕа кэлбит үлэһиттэринэн ыытан, иистэнньэҥнэр үөрүүлэрэ үксээтэ.
Улууспут баһылыгар Левин Иван Ивановичка суолталаах көмөтүгэр барҕа махталбытын тиэрдэбит. Норуот туһугар кыһамньыларын сыаналыыбыт. Салайааччыбыт Ирина Егоровна сүрүн иистэнньэҥнэрин сыаллаан-соруктаан ыыппытыгар, күүс-көмө буоларыгар махтанабыт. Эрчимнэрин, эрэллэрин сүтэрбэккэ сылдьалларыгар, үтүө холобур буола туралларыгар баҕарабыт! Туруктаахтык сылдьан, киэн далааһыннаахтык үлэлээтиннэр, доруобай буоллуннар!
Ираида Софронеева, Куокуй.