Кэбээйибит нэһилиэгэ төрүттэммитэ 385 сылыгар анаан, тэрилтэлэр кыттыылаах декада ыытылла турар. Бу декада чэрчитинэн уонна улууспутугар Култуурунай нэһилиэстибэ сылыгар анаан, балаҕан ыйын 18 күнүгэр Кэбээйитээҕи “Сайдам” норуот айымньытын киинин тэрийиитинэн, “Өбүгэ үгэһин сөргүтэн” диэн кыраһынтан аттарыллан тигиллибит кыбытыы, кыл-сиэл уонна туос оҥоһуктарга быыстапка буолан ааста.
Нэһилиэкпит уран тарбахтаах иистэнньэҥнэрэ имигэс илиилэринэн бигээн, бары сатабылларын ууран-тутан, тарбах төбөтүгэр сүүтүк кэтэн, иннэлээх саптары сыыйан, өбүгэлэрбит үгэстэрин сөргүтэн, сонун-саҥа үлэлэрин аҕалан туруордулар. Быыстапка бэлиэ түгэнигэр, “Күбэйэ” эбээлэр түмсүүлэрэ саҥа тигиллибит оноолоох соннорун көрдөрөн, мустубут дьон болҕомтолорун тартылар.
Уран тарбахтаах иистэнньэҥнэр, олохтоох автордар – Венера Лугинова, Саргылана Докторова – Айар Саргы, Ньургустаана Сметанина – Таана иистэнньэҥнэргэ анаан, суруйбут хоһоонноро ааҕылынна. Бу күн идэтийбит иистэнньэҥнэр үлэлэрин сэргэ, ааспыт кэм иистэнньэҥнэрин Обутова А.Н., Максимова Т.И., Обутова Е.М., эдьиийдии-балыстыылар – Левина З.И., Гуляева З.И. Левина О.А. өйдөбүнньүк үлэлэрэ туспа экспозициянан турда. Кэлиҥҥи кэмҥэ эдэр уонна орто саастаах кыттааччылар ахсааннара элбээн иһэрин бэлиэтии көрүөххэ сеп. Ол курдук, Дьячковская Т.О. оскуола үөрэнээччилэринээн, Захарова Е.И., Кобякова И.Г., Терехова И.В., Максимова Ф.В., Софронова В.И, Васильева М.И., Селляхова Л.Н., Докторова С.И., Лугинова В.Е., Левина М.Е., Кокорева Ф.И. үлэлэрэ көрүөхтэн кэрэ көстүүнү бэлэхтээтилэр. Уран тарбахтаах иистэнньэҥнэрбит норуот искусствотын, уус-уран оҥоһуктарын харыстааһыҥҥа, сайыннарыыга, үрдүк таһымҥа таһаарыыга, үйэтитиигэ үлэлэһэн кэллилэр.
Түгэнинэн туһанан, уран тарбахтаах иистэнньэҥнэрбитигэр сүгүрүйэн туран, уруйдаах олохторо оһуор тойугун курдук үөрүүлээх буоллун, айхаллаах чороон оһуорун курдук сиэдэрэй олохтоннуннар, өссө да айа-тута, дьону-сэргэни кэрэҕэ уһуйа туралларыгар баҕарабыт.
«Сайдам» норуот айымньытын киинэ