Тыайаҕа “Түмсүү» сынньалаҥ киинин үлэһиттэрэ дьон сынньалаҥын тэрийиинэн муҥурдаммакка, нэһилиэкпит олоҕун бары хайысхатыгар кыһаллан, айымньылаахтык сыһыаннаһаллар. Художественнай салайааччы Николай Семенович эр дьон «Дьоҕур» түмсүүтүн салайан үлэтин саҕалаан эрэр. Методист Юрий Викторович тимиргэ да маска да сатабыллаах, ыҥырыыга сылдьар көмүс тарбахтааҕа. Онтон киин салайааччыта Иван Егорович Арктика институтун бүтэриэҕиттэн, төрөөбүт дойдутугар кэлэн ситиһиилээхтик үлэлии сылдьар. Ааспыт сыл таһаарыылаах үлэтин сыаналаан, улууска культура үлэһиттэрин ортотугар «Үлэтигэр бэринии» аатын ылыан ылла. Иван Егорович айымньылаах үлэтин биир көрүҥэ- «Күндээдэ» ырыа ансамбла. Манна ырыа абылаҥар ылларбыт кулууппут эрэ үлэһиттэрэ буолбакка, нэһилиэк ыччатын эмиэ көҕүлээн ыллаталлар. Ансамбль концертарга ылбаҕай ырыа бэлэхтиирин, Кэбээйи КСК кулуубун кытары түмсэн концерт туруоралларын таһынан, араас күрэстэргэ ситиһиилээхтик кытталлар. Быйыл үһүөн уонна нэһилиэккэ тыа хаһаайыстыбатын салайар Александр Лугиновы, оҕо эрдэҕиттэн ырыа аргыстаах, эдэр, көхтөөх кыттааччы ыччаппыт Алик Обутов буолан, Хаҥалас улууһугар Ийэ дойдуга бэриниилээх буолууга аналлаах «Наследники Победы» күрэскэ кыттан бастакы степеннээх лауреат аатын ыллылар. Ону кытта, Дьокуускай куоракка кэлэн эмиэ патриотическай ырыа күрэһигэр кыттан, төрөөбүт улуустарын, нэһилиэктэрин доргуччу ааттатан кэллилэр.
Уолаттарбытыгар инникитин даҕаны айар аартыктара көнө, сырдык буола турарыгар баҕарабыт.
Екатерина Архипова