Балаҕан ыйын 19 күнэ -Кэриэстэбил күнэ.
Бу күн олохтоох библиотекаҕа Чурапчы оройуонун күүс өттүнэн хоту Көһөрүү 82 сылыгар аналлаах «Умнумаҥ чурапчы иэдээнин…» диэн Көһөрүллүү тиэмэтинэн билиһиннэрии чаастара ыытылынна. Библиотека үлэһитэ Мария Обутова үөрэнээччилэргэ көһөрүллүү ыар содулун, саха норуотун бүттүүнүн трагедията буоларын өйдөрүгэр- санааларыгар тиийэр бэсиэдэни ыытта.
Ол сэрии ыар сылларыгар Сииттэбит нэһилиэгэр Чурапчыттан күүс өттүнэн көһөрүллэн 4 холкуос («Ворошилов»,»Андреев, «Төрүт», «Кыһыл сис») дьоно кэлбиттэрэ . Манна кыра оҕолор, кырдьаҕастар, дьахталлар бааллара. Көһөрүллүүгэ кэлбит дьон оҕолоро олох охсууларын тулуйан, билигин республикабыт биллэр- көстөр биллиилээх дьоно буола үүммүттэрин билистилэр. Ол курдук, оччолорго алтатын саҥа туолбут Афанасий Петрович Мунхалов — РСФСР народнай художнига, И.Е. Федосеев- Доосо СР култууратын үтүөлээх үлэһитэ, суруйааччы, М.И. Собакин — СР үтүөлээх тутааччыта, тустарынан оҕолор олус болҕойон иһиттилэр, сэҥээрдилэр.
«Көһөрүллүү оҕо хараҕынан» диэн Сииттэ үөрэнээччилэрин, выпускниктарын уруһуйдарынан быыстапка туруоран сиһилии кэпсээтэ, ырытта. Итини таьынан «Чурапчы алдьархайа-барыбыт сүрэҕэр» кинигэ быыстапката тэрилиннэ.
Бу күн хоту күүс өттунэн көһөрүллүүгэ барбыт Чурапчы дьонун кэриэстээтибит, кинилэр сырдык ааттарыгар сүгүрүйдубут. «Чурапчы алдьархайа хатыламматын… Кэлэр көлүөнэ ыччат дьон өйдуу, кэриэстии сылдьыҥ, умнумаҥ Чурапчы иэдээнин…» диэн этииннэн билиһиннэриибит уруога түмүктэннэ.
Ити курдук, көһөрүллүү историятын билсэн аастылар. Билиһиннэрии уруогар үөрэнээччилэри киллэрбит кылаас салайааччыларыгар А.Г. Сидороваҕа, Т.И. Поповаҕа уонна С.В. Обутоваҕа үүнэр көлүөнэ ыччаты патриотическай тыыҥҥа иитэ -үөрэтэ сылдьалларыгар махталбытын тиэрдэбит.
Мария Обутова, Сииттэ нэһилиэгэ.