Сииттэбит нэһилиэгэр ааспыт нэдиэлэҕэ бырабыыталыстыба мунньаҕа буолан ааста. Мунньаҕы СР юстицияҕа государственнай комитетын бэрэссэдээтэлэ Павел Владимирович Иванов салайан ыытта. Республикабытыгар 2025 сылга ыытыллыбыт үлэлэри кэпсээтэ, билиһиннэрдэ.
Билигин дойдубут үрдүнэн анал байыаннай дьайыы буола турар кэмигэр, биллэн туран үлэлииргэ — хамсыырга ыарахан диэбэккэ, элбэх, сүҥкэн үлэлэр барбыттарын туһунан олохтоохтор астына — дуоһуйа иһиттибит. Былырыын бырабыыталыстыба бөлөҕүн иннигэр туруорсууларбыт улахан аҥара туолбутун истэн, олохтоохтор астынныбыт, ис сүрэхтэн махталбытын биллэрдибит. Этэргэ дылы ханна тутуу барар да, онно олох — дьаһах иннин диэки салаллара биллэр.
Ол курдук, нэһилиэкпитигэр олохтоох дьаһалта баһылыга Семен Тимофеев уонна кини хамаандатын күүстээх хамсаныыларынан, туруорсууларынан, 2026 сылга киэн далааһыннаах, баараҕай үлэлэр күүтүллэллэр. Холобур, эдэр исписэлиистэргэ түөрт квартиралаах дьиэ тутуута. Буоларын курдук ханнык да нэһилиэккэ айан суола элбэҕи быһаарар, ол чэрчитинэн «Баргы» биэрэгэр аны сайын саҥа дебаркадер туруоруута үөрүүлээх быһыыга — майгыга оннун булуоҕа. Ону таһынан, кырачааннарбытыгар тупсаҕай, бары ирдэбилгэ толору эппиэттиир 35 миэстэлээх уһуйааммыт тутуута салҕаныа. Саха республикатыгар Култуура сыла биллэриллибитинэн, охтоох култуурабыт дьиэтин ремоннаан, олохтоохторго аны күһүн аанын тэлэччи арыйарын күүтэбит. Маны таһынан суол — иис боппуруостарыгар улахан үлэлэр ыытыллаллара сабаҕаланар. Биир улахан көрдөһүүбүтүнэн үрэхпитин туоруур муостабыт биллэрдик хамсаабытын, ону көннөттөрүү ремонтнай үлэни ыытарга көмө буолар.
Нэһилиэкпитигэр өссө да үлэ элбэх. Онтон итини барытын олоххо килэрэргэ төһөлөөх сыра баранара, кумааҕы суруллара, үп — харчы баранара буолуой? Ол да буоллар, ити барыта олох хаамыыта буоларын бары өйдүүбүт, билэбит.
Сииттэлэр туохтан да толлубакка, аныгы тэтимнээх олоҕу кытта тэҥҥэ хардыалаһан, сөптөөхтүк дьаһанан, саҥаны арыйан, инники диэки эрэллээхтик хардыылыырга бэлэммит.
Марианна Сивцева