Муус устар 9 — 10 күннэригэр, Дьокуускай куоракка — УҺулуччулаах судаарыстыбаннай уонна бэлитиичискэй диэйэтэл Гаврил Иосифович Чиряев 100 сылыгар аналлаах V-с өрөспүүбүлүкэтээҕи «БАСХАН — 2025»
дьылабыай оонньуу үрдүк таһымнаахтык ыытылынна.
Кэбээйи улууһун аатыттан, «Баҕадьа сүрүн оскуолатын» 8 кылааһын үөрэнээччитэ Сахаян Докторов кыттыыны ылла. Салайааччылара: Михайлова Варвара Васильевна, Докторов Николай Васильевич.
Бу дьылабыай оонньууну Үөһээ Бүлүүтээҕи «Тускул» оҕо айымньытын киинэ, улуустааҕы “Сомоҕо” оҕо хамсааһына, Исидор Никифорович Барахов аатынан Саха Өрөспүүбүлүкэтин судаарыстыбаннаһын түмэлэ, Саха Өрөспүүбүлүкэтин оҕолорун уопсастыбаннай холбоһуктарын сойууһа уонна “Сахамедиа” өрөспүүбүлүкэтээҕи холдинг киинэ тэрийэн ыыталлар. Быйылгы оонньууга 12 улуустан: Горнайтан, Мэҥэ-Хаҥаластан, Томпоттон, Намтан, Хаҥаластан, Бүлүүттэн, Сунтаартан, Кэбээйиттэн, Амматтан, Чурапчыттан, Үөһээ Бүлүүттэн уонна Дьокуускайтан уопсайа 20 басхан уол илин-кэлин түһүстүлэр.
Күрэх бастакы күнүгэр кыттааччылар «Удьуор утума»; «Өркөн өй»; «Дойду салайааччылара мин харахпынан» түһүмэхтэри аастылар. Иккис күнүгэр мөккүөр түһүмэх тиэмэтинэн тыа хаһаайыстыбатыгар ыччаты сыһыарыы: төрүт дьарыгы тутан хааларбыт сайдыыга тиэрдиэ дуо? — диэн буолла.
Күрэхтэһии түмүгүнэн бастыҥнар ааттаннылар. Кэбээйи кыттааччыта Сахаян Докторов Үөһээ Бүлүү улууһун анал бирииһин уонна 6 миэстэҕэ тиксэн улууһун аатын чиэстээхтик көмүскээтэ. Сахаяны уонна кини салайааччыларын маннык үрдүк таһымнаах уустук күрэххэ ситиһиилээхтик кыттыбыттарынан эҕэрдэлиибит. Үрдүктэн үрдүк ситиһиилэр өссө да кэлэ турдуннар!
Светлана Оконешникова