Улуу Кыайыы 80 сылынан Баҕадьа бөһүөлэгэр араас хабааннаах тэрээһиннэр буоллулар. Ол курдук, сыал ытыытыгар нэһилиэнньэ бары араҥата көхтөөхтүк кытыннылар.
Сэрии сылын оҕолорун, нэһилиэк олохтоохторун эҕэрдэлээн «Кыайыы ньиргиэрэ иһиллэр» диэн оскуола оҕолоро олохтоох араадьыйанан хоһоон ааҕан иһитиннэрдилэр. Киэһэтин «Свеча памяти» эмиэ олус уйаннык ыытылынна.
Ыам ыйын 7 күнүгэр Баҕадьатааҕы сүрүн оскуола үөрэнээччилэрин улахан концера көрөөччүлэр биһирэбиллэрин ылла. Ыам ыйын 9 күнүгэр, «Бессмертный полк» хаамыыга эһэлэрин, эбэлэрин хаартыскатын күөрэччи тутан бары бииргэ түмсэн парадка хаамтыбыт. Эҕэрдэ тыллары эттилэр: нэһилиэк баһылыга С.С. Григорьев, сэрии сылын оҕолоро Т.Д. Васильев, А.Н. Николаев, СВО кыттыылааҕа И.Г. Горохов, библиотекарь Д.А. Андреева.
«Чуораанчык» детсад иитиллээччилэрин уонна оскуола оҕолорун эҕэрдэ ырыаларын-хоһооннорун иһиттибит. «Полевая кухня» үлэлээтэ. 4ч. Сэрии сылын оҕолоругар уонна аҕам саастаахтарга администрация кэлэктиибэ астаах остуол тэрийдэ, дуоһуйа кэпсэтэн, астынан тарҕастыбыт. Киэһэтин тэрилтэлэр ардыларынан инцинированнай күрэх буолла.
Ити курдук, Баҕадьа бөһүөлэгин олохтоохторо Кыайыы 80 сылын «Умнубаппыт. Өйдүүбүт. Махтанабыт»диэн үөрэн көрүстэ.
Дария Андреева