Арыктаах нэһилиэгэр Кыайыы парада уонна миитин үөрүүлээх, бэлиэ күҥҥэ олохтоохтору түмтэ. Кыайыы 80 сылын көрсө дьаһалта баһылыга Ангелина Сивцева «Нэһилиэк бочуоттаах олохтооҕо» диэн мэтээллэри уонна үрдүк ааты туоһулуур удастыбырыанньалары Николаев Дмитрий Ивановичка, Ноговицына Ирина Григорьевнаҕа уонна өр сылларга Арыктаахха баһылыгынан үлэлээбит Татаринов Агей Ивановичка туттарда.
Сэрии кэмин оҕото Николаев Дмитрий Иванович, оскуола директора Ноговицын Сергей Владмирович эҕэрдэ дакылааттары оҥордулар. Нэһилиэкпит кырдьаҕас олохтоохторугар анаан полевая кухня, итии чэй, кус арааһын амсаттылар. Уруккуну-билиҥҥини ахтан-санаан сэһэргэстилэр.
Киэһээ 7 чаастан эҕэрдэ кэнсиэр уонна тэрилтэлэр икки ардыларынааҕы сэриигэ аналлаах ырыаларга конкурс буолла. Бастакы миэстэни — детсад, иккиһи — оскуола кэлэктииптэрэ ыллылар. Үсүһү — олохтоох дьаһалта, ФАП, ОДьКХ, кыра тэрилтэлэр ыллылар. Нүөмэрдэр быыстарыгар урбаанньыттар бириистэригэр лотерея буолла. «Айылгы» культура киинэ Кыайыы 80 сылын үрдүк таһымнаахтык тэрийдилэр, дьону-сэргэни сэргэхситтилэр.
Петр Ноговицын, Арыктаах нэһилиэгэ.