Кэбээйи улууһун Арҕас сэлиэнньэтигэр кыһыҥҥы айан суолун сырдатыы олоххо киирэриттэн олохтоохтор үөрүүлэрэ үксээтэ.
Бу суолталаах үлэ туһунан нэһилиэк баһылыга Лев Николаевич Павлов сырдатта:
— Нэһилиэк иһинэн ааһар кыһыҥҥы айан суолун сырдатыы үлэтэ кулун тутар 10 күнүттэн саҕаланна. Бу үлэбит олоххо киирэригэр улууспут баһылыга Иван Иванович Левин, улуус дьаһалтатын үлэһиттэрин өйөбүлэ улахан күүс буолла. Дьаһалта үлэһиттэрэ көҥүл ылыы, былаан, документация өттүн түргэнник бөрөөтүлэр. Кыһыҥҥы суолбут нэһилиэкпит кытыы уонна саамай кырдьаҕас, дьоҥҥо-сэргэҕэ «центральнай» диэнинэн биллэр Павлова уулуссабытынан ааһар. Онон нэһилиэкпит иһинэн ааһар кыһыҥҥы айан суолун Кытыаннаах уулусса саҕаланыытыттан оскуола иннинэн ааһан Павлова уулусса кыйа, уопсайа 46 уот остуолбата туруоруллан светодиоднай лаампа ыйаныллара былааннанар. Уопсайа 3 километр курдук усталаах суол сырдатыллыа. Күн бүгүн урбаанньыт А.И. Васильев тэрилтэтин үлэһиттэрэ остуолба туруоруутугар үлэлии сылдьаллар. Былаан быһыытынан үлэ барыта муус устар ый бүтүүтэ түмүктэниэхтээх.
Ситэрэн эттэххэ, Саха сиринээҕи “Управление автодорог” бу кыһыҥҥы суолу сырдатыы, кэмигэр ремонт үлэтин, ону тэҥэ уот линиятыгар холбонуу бэйэтэ уйунар. Түгэнинэн туһанан, Куокуй нэһилиэгин дьаһалтатын, олохтоохторун ааттарыттан улууспут дьаһалтатыгар, чуолаан баһылыкпытыгар Иван Ивановичка махталбытын тиэрдэбит.
Куокуй нэһилиэгин олохтоох дьаһалтатыгар былааннабыттара барыта кэмигэр туоларыгар баҕарабыт.
Надежда Илларионова.
Нина Олесова хаартыскаҕа түһэриитэ