Үтүө быһыыны амарах санаалаах, туруу үлэһит дьон оҥороллор диэтэхпитинэ сыыспаппыт буолуо. Кэбээйи улууһун Куокуй нэһилиэгэр убайдыы-бырааттыы Давид, Геннадий Ивановтар сылын ахсын сүрэхтэрин баҕатынан үтүө санаа акциятын тэрийэн ыыталлар. Даҕатан эттэххэ, Ивановтар үтүө санаа акциялара сылы супту оҥоһуллар.
Ол курдук, аҥардас дьахталларга, элбэх оҕолоох дьиэ кэргэҥҥэ, аҕам саастаах кырдьаҕастарбытыгар, инбэлииттэргэ күөх боллох кэһиитин өрүүтүн ирээттииллэр. Ивановтар бииргэ төрөөбүт бырааттара, Григорий, анал байыаннай дьайыыга мобилизацияламмыта 2 сыл буолла, онон уолаттар анал байыаннай дьайыыга сылдьар байыастарбыт дьиэ кэргэттэрин тумнубаттар. Ол курдук, дьиэ тас үлэтигэр, от охсуутугар, хаар күрдьүүтүгэр, муус ылыытыгар, таһыытыгар өрүү күүс — көмө буолан абырыыллар. Уолаттар бэйэлэрин «Добрые волонтеры» диэн сүрэхтэммиттэр. Нэһилиэк олохтоохторо үөрэн, махталлара улахан. Быйылгы Өрөспүүбүлүкэбит судаарыстыбыннаһын көрсө «Үтүө санаалаах волонтердарбыт» Луҥха кытылыгар субботник тэрийэннэр, сайынын оҕолор сөбүлээн мустар «Пляж» диэн ааттыыр сирдэригэр дылы хас да куул бөҕү ыраастаабыттар.
Бу буолар Айылҕа оҕолоро диэн. Барыта бэйэлэрин ыраас дууһаларыттан тахсар, санааларын ууран туран үтүөнү оҥороллор. Уолаттарга бары үчүгэйи, инникигитигэр санаа хоту санаабыккыт сатаннын!
Куокуйтан Полина Андреевна.