Түмэл күнүн көрсө, Улуу Кыайыы 80 сылын чэрчитинэн, буойун- учуутал В.Е. Колмогоров аатынан оскуолаҕа «Кыайыы көтөллөөх үбүлүөйдээх буойуттарбыт» диэн музейнай-библиотечнай уруок буолла.
«Бу — уоттаах сэриигэ сырдык тыыннара быстыбыт саллааттары кэриэстээһин, кыргыһыы хонуутугар дьоруойдуу охсуспут уонна тыылга бэйэлэрин умнан туран үлэлээбит, сэрии кэнниттэн эйэлээх халлаан анныгар дьоллоох олоҕу уһансыбыт дьоммутунан киэн туттуҥ, кинилэр сырдык ааттарын хаһан да умнумаҥ . Биһиги эһэлэрбит, аҕаларбыт, убайдарбыт эр санааны,хорсун быһыыны көрдөрбүттэрэ. Аҕа дойду Улуу сэриитигэр эйэлээх олох иһин сырдык тыыннарын толук уурбут буойуттарбытыгар сүгүрүйэн туран, тэрээһиммитин саҕалыыбыт», — диэн үөрэнээччилэргэ туһаайан оскуола директора А.В. Новгородов киирии тылынан уруок саҕаланна.
«Сииттэ оҕолоро кэпсииллэр» диэн Кыайыы 70 сылыгар 2015 сыллаахха уһуллубут видеону көрөн бары да олус сэргээтибит. Ол кэмнэргэ үөрэммит оскуола выпускниктара, үөрэнээччилэрэ хос эһэлэрин, чугас- аймах дьоннорун туһунан олус истиҥник кэпсээбиттэрэ барыбытын долгутта, үөртэ. Салгыы кылааһынан оҕолор эһээлэрин мэтириэттэрин тутан, кинилэр хорсун быһыыларынан киэн тутта кэпсээн-ипсээн, ахтан- санаан аастылар.
Быйыл 32 үбүлүөйдээх буойуттарбытын кэриэстээн, санаан, сүгүрүйэн ыллыбыт. Олохтоох библиотека үлэһитэ Мария Обутова нэһилиэкпитигэр Үйэтити сылынан сэриигэ уолаттарын атаарбыт ийэлэр тустарынан сырдатта. Оскуола краевед учуутала Анна Лазаревна Сивцева нэһилиэкпит историятын үөрэтиигэ, билиигэ элбэх өрүттээх үлэни ыытарын бэлиэтиибит.
«Хомойуох иһин, билигин биһиги улууспутугар да, нэһилиэкпитигэр да, ол уоттаах сэрии биир да кыттыылааҕа хаалбата… Кыайыыны уһансыбыт бука бары дьоммутугар биһиги ытык иэспит — Ийэ дойдуга ытык иэстэрин чиэстээхтик толорбут дьоммут килбиэннээх ааттарын үйэтитии, кинилэр бойобуой суолларын сырдатыы, үүнэр сүһүөх ыччаппытыгар Аҕа дойдуга ытыктабылы, бэриниилээх буолууну иҥэриэҕэр эрэлбит улахан», -диэн түмүктээтэ уруогу Анна Сивцева.
Бүгүҥҥү тэрээһини иилээн-саҕалаан ыыттылар краевед — учуутал Анна Сивцева уонна саха тылын, литературатын учуутала Мария Яковлева.
Кыайыыны уһансыбыттар ааттара умнуллубат — үйэлэргэ тыыннаахтар!
Мария Обутова,
Сииттэ нэһилиэгэ.