Куокуй нэһилиэгин Арҕас бөһүөлэгин ытык мааны Аҕам саастаах олохтоохторугар алтынньы 7 күнүгэр истиҥ тэрээһин буолан ааста. Бу күн, нэһилиэккэ олорор, үлэлиир 70 саастарыттан үөһээ саастаах дьоммут муһуннулар.
Мустуу көрсүһүү кэмигэр » Куокуй коллекционердара» — Спиридонова В.Н., Семенова Т.Г., Павлов А.С., Спиридонова И.И., Игнатьева О.И., Иванов Г.В. туруорбут, нэһилиэкпит «Ача» уһуйаанын иитиллээччилэрэ, орто оскуола үөрэнээччилэрэ » Кэбээйи улууһун нэһилиэктэрин гербэлэрэ» бэлэмнээбит быыстапкаларын көрдүлэр сэҥээрдилэр. Тэрээһини Куокуй тыа сирин түөлбэтин баһылыга Павлов Л.Н., бэтэрээн сэбиэтин салайааччыта Олесова Н.Е. эҕэрдэлээн саҕалаатылар. Бэлиэ даталаах аҕам саастаахтарга эҕэрдэ суруктары, сэмэй бэлэхтэри туттардылар. Бу күҥҥэ сыһыары тутан, 50 сыл бииргэ олорбут, кыһыл көмүс сыбаайбалаах нэһилиэкпит ытыктанар ыалын Лидия, Василий Петровтары наҕараадалааһын буолла. Тэрилтэлэр өр сылларга үлэлээбит бэтэрээннэригэр бэлэхтэри туттардылар. Кэнчээри ыччаттарбыт Куокуй орто оскуолатын 2-4-5-6-9 кылаастара ыллаан сэргэхситтилэр.
Биир дойдулаахпыт Гуляева Матрена Николаевна саҥа тахсыбыт кинигэлэрин сүрэхтэниитэ буолла, Матрена Николаевна хоһоонугар саҥа айбыт ырыатын Татьяна Суздалова ыллаан кэлбит саастаах дьоммутун сэргэхситтэ. Олохтоох библиотекаларга, бииргэ үөрэммит үөлээннээхтэригэр туттарылыннылар, бибилитиэкэ сэбиэдиссэйэ Варвара Никифоровна викторина, Нина Егоровна оонньуулары ыытан «Угуйаан,» култуура кэллэктиибэ бириистэри туруоран, олохтоох дьаһалта, социальнай управление, кулууп, уопсастыбаннай түмсүүлэр ас астаан остуол маанытын тардан бэлиэ күн санаа хоту, олус тэрээһиннээхтик ыытылынна.
Бу курдук үгэс буолбут тэрээһиннэр ыытыллыылара сылтан сылтан кэҥээн кэрэхсэнэллэрэ, хас биирдии кыттыбыт олохтоох үлэһит дьоммутугар дириҥ убаастабылы биэрэрэ саарбаҕа суох. Маннык өрүү түмсүөҕүҥ, сомоҕолоһуоҕуҥ!
Татьяна Гаврильева (Суздалова), Арҕас бөһүөлэгэ, Кэбээйи