Кэбээйитээҕи “Сайдам” норуот айымньытын киинигэр, Олунньу 23 күнүгэр, Аҕа дойдуну көмүскээччилэр күннэригэр уонна СӨ култуура сылыгар анаан, “Икки сулус” дуэттар конкурстара үрдүк таһымҥа ыытылынна. Күрэххэ култуура үлэһиттэрин уонна нэһилиэкпит талааннаах ырыаһыттарын кытта, сыанаҕа соҕотохтуу тахсан ыллаабатах, ырыа куттаах, араас идэлээх, дьарыктаах, үлэлээх 24 кыттааччы кыттыыны ыллылар. Ол курдук, дьиэ кэргэн мааны ийэтэ, “Мичээр” оҕо уһуйаанын иитээччилэрэ, олохтоох дьаһалта испэсэлииһэ, орто оскуола үлэһиттэрэ, модельнай библиотекаттан, оҕо спортивнай оскуолатыттан, врачебнай амбулаторияттан саһа сыппыт талааннар арылыннылар. Саала толору көрөөччүлэрэ — интэриэһинэй, сэргэх ырыа күрэҕин кыттааччыларын, дохсун ытыс тыаһынан арыаллаатылар. Кыттааччыларбыт толорор ырыаларын биир санаанан бэркэ талан, ылбаҕай ырыалара мустубут дьон дууһатын таарыйдылар.
Ол эбэтэр, 1 миэстэни — Анастасия Обутова “Мичээр” оҕо уһуйаанын иитээччитэ уонна Прокопий Иванов баһаарынай чаас үлэһитэ, 2 миэстэни — Марина Иванова М.С.Сметанина аатынан врачебнай амбулатория уонна Мария Федотова Е.Е.Эверстов аатынан Кэбээйи орто оскуолатын үлэһитэ, 3 миэстэни — Любовь Семенова култуура сайдыытын киинин салайааччыта уонна Мария Левина И.В.Терехов аатынан оҕо спортивнай оскуолатын үлэһитэ кыайыы өрөгөйүн биллилэр. Маны таһынан, “Икки Сулус” күрэх кыттыылаахтарыгар барыларыгар анал ааттар иҥэрилиннилэр. Бу кэрэ киэһэни иилээн-саҕалаан ыыттылар: Наталья Полятинская – “Сайдам” норуот айымньытын киинин салайааччыта уонна талааннаах ырыаһыт — Иван Софронов-Сандал. Оттон биһиги тэрийээччилэр, ырыа түһүлгэтин көхтөөх кыттааччыларыгар махтал тылларын этэн туран, ыллыыр ырыаларгыт өрүү аргыстаннын үөрүүнэн, сыдьаайдын сырдыгынан, толору иһирэх иэйиинэн – диэн алгыс тылбытын тиэрдэбит.
Наталья Полятинская