Горнай улууһун Атамай нэһилиэгэр Саха Өрөспүүбүлүкэтин кыра нэһилиэктэрин икки ардыларыгар 12-с төгүлүн волейбол күрэҕэ үрдүк таһымҥа буолан ааста.
Күрэххэ кыттыыны ыллылар:
1. Сииттэ нэһилиэгэ, Кэбээйи
2. Сиинэ нэһилиэгэ, Хаҥалас
3. Тит-Ары нэһилиэгэ, Хаҥалас
4. Байаҕантай нэһилиэгэ, Уус-Алдан
5. Соловьев нэһилиэгэ, Чурапчы
6. Бүлүүчээн нэһилиэгэ, Сунтаар
7. Тыайа сэлиэнньэтэ, Кэбээйи
8. Алтан нэһилиэгэ, Амма
9. 1-кы Баатара нэһилиэгэ, Мэҥэ Хаҥалас
10. Тараҕай нэһилиэгэ, Мэҥэ Хаҥалас
11. 1-кы Дьөппөн нэһилиэгэ, Хаҥалас улууһа
12. Орто-Сурт нэһилиэгэ, Горнай
13. Күөрэлээх нэһилиэгэ, Горнай
14. Атамай нэһилиэгэ, Горнай.
Үс спортивнай саалаларынан ыытыллыбыт, күүстээх оонньуу түмүгүнэн, кыайыылаахтарынан таҕыстылар
бастакы миэстэҕэ — Сииттэ нэһилиэгэ, Кэбээйи улууһа. Иккис миэстэни Танда нэһилиэгэ, Уус Алдан улууһа, үһүс бочуоттаах миэстэни Орто-Сурт нэһилиэгэ, Горнай улууһа ыллылар.
Биирдиилээн номинацияларга:
«Лучший связывающий» — Ноговицын Игорь, Сииттэ нэһилиэгэ, Кэбээйи улууһа.
«Лучший нападающий» — Максимов Николай, Сииттэ нэһилиэгэ, Кэбээйи улууһа.
Икки күннээх волейбол күрэҕэр республика араас муннуктарыттан уопсайа 7 улуус, 14 нэһилиэк, 18 хамаанда (12-уолаттар, 6-кыргыттар), барыта 155 оонньооччу кыттыыны ыллылар.
Ыалдьыттары олус истиҥник көрсөн, олохтоон, итии аһылыгынан хааччыйбыт Атамай нэһилиэгин орто оскуолатын коллективыгар уонна олохтоох урбаанньыт Филипповтар дьиэ кэргэттэригэр, АКСК «Атамай» бары үлэһиттэригэр уонна күрэҕи иилээн-саҕалаан ыыппыт Республикатааҕы волейбол Федерациятыгар, улуус дьаһалтатыгар, судьяларыгар, тэрийээччилэргэ уонна күрэх кыттыылаахтарыгар бэртээхэй, чаҕылхай оонньуу көрдөрбүттэригэр барҕа махталларын тиэртилэр. Тус олохторугар чөл туруктаах чэгиэн-чэбдик доруобуйаны, үлэҕэ-хамнаска ситиһиилэри, бары кэрэни-үтүөнү баҕарабыт диэн баҕа санааларын эттилэр.
Өр сылларга волейбол оонньуу бары кистэлэҥин толору баһылаабыт, үөрэнээччилэрин угуйбут тренерынан буолар Сииттэ орто оскуолатын физкультураҕа учуутала — Иннокентий Лазаревич Охлопков. Кини күн бүгүнүгэр дылы үөрэнээччилэрин кытта сибээһин быспакка, ыытыллар бары күрэхтэргэ түмэ охсон, Сииттэлэрин, Кэбээйилэрин улууһун аатын республикаҕа элбэхтик аттатан, көмүскээн кэлбит, улууспутугар биир бастыҥ хамаанда буоларынан киэн туттабыт. Өссө да ситиһиилэр кэлэ турдуннар, уолаттарбытыгар дьолу, доруобуйаны баҕарабыт!
Марианна Сивцева