Бүгүн, иккис күн, нэһилиэк олохтоохторо, учууталлар, улахан кылаас үөрэнээччилэрэ уонна араас улуустартан кэлбит ыалдьыттар тэрээһиннэргэ көхтөөхтүк кытыннылар.
Сарсыарда кыһыҥҥы тыҥ хатыыта нэһилиэк историческай суолталаах сирдэринэн автоэкскурсия тэрилиннэ. Ынах Булуҥа эбэҕэ улахан муҥха түһэриллэн, муҥха сахалыы үгэстэрэ көрдөрүлүннүлэр. Саха сиэрэ-туома тутуһуллан, муҥха алгыһынан арылынна.
Кэлбит ыалдьыттар «Оһуор тойуга» диэн олохтоох уустар быыстапкаларын сэргээн көрдүлэр уонна үрдүктүк сыаналаатылар.
Иккис күн саамай кэтэһиилээх түгэнинэн «Собо барахсан!» диэн соботтон араас аһы астаан амсатыы буолла. Оттон өркөн өйдөөхтөр «История. Культура. Фольклор» диэн квиз-оонньууга билиилэрин тургутар кыахтаннылар.
Маны сэргэ эдэр ыччат ортотугар «Муҥха Олоҥхото» күөн күрэс салҕанан барда. Киэһэлик тэрээһин үөрүүлээхтик түмүктэннэ, кыайыылаахтар ааттара ааттанна. Муҥутуур кыайыылааҕынан Хаҥалас улууҺутан Прасковья Прокопьева буолла!
Бу тэрээһин Кэбээйи нэһилиэгин култууратын байытыыга, саха үгэстэрин үйэтитиигэ улахан суолталаах буолла.
Мария Павлова
Ааптар хаартыскаҕа түһэриилэрэ.