Кыайыы үбүлүөйдээх сылын чэрчитинэн Кэбээйигэ эмиэ биир өйдөбүнньүк бэлиэ үлэ дьонун аатын үйэтитэрдии бигэтик турда. Бэлиэ чуолаан ааспыт үйэ советскай былаас саҕана бэйэтин үлэтинэн Кэбээйи нэһилиэгэр, Кэбээйи оройуонугар биллибит орто звено салайааччыта, биригэдьиир Левин Егор Николаевичка ананна. Егор Николаевич 1920 сыллаахха Кэбээйи нэһилиэгэр төрөөбүтэ. 1938 сыллаахха Кэбээйи оскуолатын бэһис кылааһын бүтэрэн «Калинин» холкуоска араас сурук-бичик үлэтигэр үлэлээбитэ.
Аҕа дойдуну көмүскүүр сэриигэ 1942 сылаахха барта. Кини ити сыллардааҕы туоһутунан буолаллар «Аҕа дойду сэриитин II истиэпэннээх» уордьана, «Кавказ оборонатын иһин», «Берлини ылыы иһин», «1941-45 с.с. Германияны кыайыы иһин» мэтээллэрэ.
1948 сыллаахха армияттан демобилизацияланар уонна төрөөбүт дойдутугар эргиллэн кэлэр. Ити сыл ыам ыйыгар дойдутун булаат «Калинин» холкуоска биригэдьииринэн үлэҕэ ылыллар уонна бу үлэҕэ орто дойдуттан барыар диэри ханна да тэйбэккэ 24 сыл устата үлэлээбит туруу үлэһит киһи этэ.
Егор Николаевич аатын 2002 сыллаахха Кэбээйи н. уулуссатыгар Калинин түөлбэтигэр олохтоох депутаттар уураах таһааран иҥэрэн тураллар. Үүнэр ыччат бу Левин Е.Н. диэн туох киһи буоларын, кини аатын бу уулуссаҕа мээнэ анаабатахтара чуолкайын туоһулаан туран кэпсэнэр бэлиэ туһааннаах сиригэр, ол эбэтэр Левин уулусса саҕаланыытыгар туруорулунна.
Бу бэлиэ олохтоох сирин булуутугар, аһыллыытыгар Егор Николаевич Левин оҕолоро, ыччаттара, нэһилиэк баһылыга И.И.Левин, бэтэрээннэр сэбиэттэрин бэрэсэдээтэлэ Е.А.Павлов, олохтоох депутаттар С.С.Кобяков, А.П.Кобякова, бырайыак ааптардара Т.Д.Максимова, А.П.Кобякова, орто оскуолаттан А.А.Гуляев салайааччылаах 9 “а” университетскай физико-математическай кылаас үөрэнээччилэрэ тыл этэн, хоһоонунан доҕуһуоллаан туран астылар.
Бу бырайыак ааптардарын туһунан таарыйан аастахха, “Мичээр” оҕо тэрилтэтин иитээччилэрэ Максимова Т.Д. уонна Кобякова А.П. “Дьоһун дьону үйэтитэн” патриотическай кэскиллээх бырайыактарын үлэтин түмүгүнэн бу ытык бэлиэ төрөөн таҕыста.
Кэбээйи н. үгүс уулуссалар үлэ дьоруойдарын, дойдуларыгар бэриниилээх бииртэн-биир үйэтитэргэ анаммыт ааттаах-суоллаах дьон ааттарын сүгэн тураллар. Бу дьоруой дьону сырдатар, кэпсиир бэлиэлэр туруорулларга аналлаахтар.
Татьяна Максимова-Лазарева