Сииттэбит кэрэ аҥардара буоларын курдук рассаада арааһын олордон, бар дьоннорун кытта опыттарын атастаһаллара сыл аайы элбээн иһэр.
Ол курдук, Кыайыы 80 сылынан сибээстээн, хас биирдии искибиэрбитин «Кыайыы букеттара» диэн сибэкки эгэлгэтин ыһан бөһүөлэкпитин киэркэтэр улахан былааннаахпыт. Маны таһынан билиҥҥи үйэҕэ кырдьыгынан эттэххэ, соҕурууттан кэлбит оҕуруот астара нитраттаах буоларын бары бэрткэ билэбит. Аҥардас ол инниттэн кылгас сайыммытыгар бэйэ биэбэйдээн үүннэрбит, сибиэһэй оҕуруоппут аһынан хааччынарбыт хайаан да наадалаах суол буоларын хаһаайкаларбыт бириэмэтигэр өйдөөн, хамаҕатык олордор буолтара олус кэрэхсэнэр суол.
Инники суруйан турабыт, олохтоох культуура дьиэтин үлэһиттэрин көҕүлээһининэн, ахсыс сылбытын оҕуруот аһын арассаадатын арааһын атыылыырбыт таһынан, кылгас, күөх сайыммытын симиир, сибэкки араас эгэлгэтин арассаадатын удамыр сыанаҕа атыылаан культуурабыт дьиэтигэр эбии дохуот киллэринэрбит үгэскэ кубулуйбута ыраатта. Ол курдук, быйыл эмиэ эдэр хаһаайкаларга күүс — көмө, сүбэ — ама буолаары, аныгы үйэ тэтимигэр олорсон ватсап группа арыйдыбыт. Группаҕа Сииттэбит оҕуруотчуттара бары киирдилэр. Кинилэр олордорго хаппырыыс соҕус оҕуруот астарын, холобура хаппыыста суортарын, дьэдьэннэри, хайдах көрөн — истэн олордор туһунан, ситим нөҥүө сүбэлии — амалыы олороллоругар улахан махталбытын тиэрдэбит.
Быйыл олохтоох дьаһалта баһылыга Семен Тимофеев көмөтүнэн, олохтоох культуура үлэһиттэрин көҕүлээһиннэринэн, аны сайын оҕолорбутугар анаан пришкольнай учаастак үлэлэтэргэ улахан былааннаахпыт. Оҕолорбут салат набордарын (укроп, петрушка, салат, лук — порей, свекла, морковь, помидор уонна битэминнээх оттору) олордон боруобалыахтара. Ыам ыйыгар эмиэ сөбүгэр арассаада арааһа атыыланара былааннанар. Онон улууспут дьонугар аны күһүн, Сииттэбит өлгөм үүнүүлээх дьиэ кэргэттэрин, бөһүөлэкпит иһигэр баар Кыайыыбыт искибиэрдэрин хараҕы үөрдэр, кыраһыабай сибэккилэринэн симэммиттэрин көрдөрүөхпүт, билиһиннэриэхпит диэн эрэннэрэбит.
Марианна Сивцева