Кэбээйи нэһилиэгин П.Д. Степанов кыраайы үөрэтэр түмэл иһинэн тэриллибит » Харыстаана» коллекционердар түмсүүлэрэ, Зоя Яковлевна Сметанина салайааччылаах, Арҕас сэлиэнньэтин «Угуйаан» култуура киинигэр көрүстүбүт.
«Луҥха долгуннара» үҥкүү түмсүүтүн эҕэрдэ үҥкүүтүнэн тэрээһин арылынна. «Харыстаана» түмсүү кыттыылаахтара бэйэлэрин коллекцияларын быыстапка туруоран, хас биирдии коллекционер бэйэтин коллекциятын историятын кэпсээн, быыһыгар оонньуу боппуруос биэрэн да ыллылар. Оскуола оҕолоро бэт интэриэһиргээн көрдүлэр. Төгүрүк остуол тула кэпсэтэн, сүбэ-ама ыллыбыт. «Харыстаана» түмсүү 2022 сыллаахха тэриллибиттэр. Нэһилиэктэрин иһинэн ыытыллар араас тэрээһиннэргэ күүстээхтик кыттыһан, өрөспүүбүлүкэҕэ биллэ тахсыбыттар. Арҕас олохтоохторо коллекционердарбыт күүстэринэн эмиэ быыстапка тэринэн көрдөрүүгэ таһааран туруордубут. Ольга Ивановна Гуляева «Чуораанчыктар», Ираида Николаевна статуэткалары, Марина Обутова урукку открыткалары, вышивка брошюркаларын, Тамара Семенова чороон коллекциятын, үрүҥ көмүс оҥоһуктары, сыл символларын, Ася Ивановна чорооннор коллекцияларын, Евдокия Новгородова гжель сувенирдарын, Анисия Гуляева ручка араас көрүҥнэрин, Анна Павлова үрүҥ көмүс набордарын, значок коллекциятын, Варвара Спиридонова значоктары, араас сыллар истиэнэ халандаарын, истиэнэҕэ ыйанар араас омук сирдэрин тэриэлкэлэрин, Геннадий Васильевич хаартыскаларын, төрүччүтүн оҥорбутун, сыл-хонук бэлиэлэрин,
брошюркаларын быыстапкаҕа туруордулар.
Нэһилиэкпит бэлиэ миэстэлэринэн — «Сибэкки-биһикки»духобунас искибиэригэр, «Үлэ албан аат», «Өйдүүбүт, сүгүрүйэбит, махтанабыт» мемориальнай комплекска, Күбээдэккэ «Син биир этиэҕим сирдээҕи дьолу билэбин» мемориальнай комплекска сырытыннардыбыт, кэпсээтибит. Бириэмэ аттарынан оскуолаҕа тахсан, Сардана Иннокентьевна оскуолатын көрдөрөн, үлэтин-хамнаһын билиһиннэрдэ. Бэрт интэриэһинэй тэрээһин буолан ааста. Бу тэрээһин түмүгүнэн, биһиги нэһилиэкпит коллекционердарын түмсүүтүн тэринэргэ быһаарынныбыт, бииргэ үлэлэһэргэ быһаарыстыбыт. «Харыстаана» түмсүү коллекционердарыгар барҕа махталбытын тиэрдэбит. Баҕарабыт ситиһиилэри, өссө да коллекцияҕыт эбиллэ туруохтун, үрдүү, үүнэ, сайда, чэчирии туруҥ!
Түгэнинэн туһанан «Луҥха долгуннара» үҥкүү кыттылаахтарыгар махтанабыт, быыстапкаҕа кыттыбыт коллекционердарбытыгар баһыыба бастыҥа, махтал мааныта!
Полина Жергина, Куокуй нэһилиэгэ