Муус устар 3-4 күннэригэр Сииттэбит нэһилиэгэр Кыайыы 80 сылын көрсө «Чурапчы оройуонун хоту көһөрүллүүтүн» устуоруйатын үөрэтэ, үлэлии » Кэскил» хаһыат кылаабынай редактора Сардаана Матвеева уонна С.К. Макаров аатынан Чурапчы гимназиятын 8 «а»кылааһын үөрэнээччитэ София Гоголева икки күн айымньылаахтык үлэлээн бардылар.
Ол курдук, буойун учуутал В.Е. Колмогоров аатынан оскуола учууталларын, үөрэнээччилэрин кытта көрүстүлэр, үлэлээтилэр. «Арыылаах» учаастакка чурапчыларга аналлаах «Өйдөбүнньүк» бэлиэҕэ сырыттылар, интервью ыллылар. «Эрэл» проект ааптара Роман Попов «Өйдөбүнньүк» туһунан үлэ хайдах саҕаламмытын сиһилии кэпсээтэ, интервью биэрдэ.
Салгыы олохтоох библиотекага Чурапчыттан сыдьааннаах «Утум «общественнай түмсүүнү кытары көрүстүлэр, «Төгүрүк остуол» тула олорон ирэ-хоро сэһэргэстилэр. Олохтоох ааптар Василиса Попова «Уоскутуҥ ол сырдык куттары» хоһоонун Мария Захарова ааҕыытынан тэрээһиммит саҕаланна. Киирии тылы олохтоох дьаһалта баһылыгын солбуйаааччыта Петр Петрович Степанов нэһилиэк олоҕун, үлэтин -хамнаһын кылгастык билиһиннэрдэ. Краевед- учуутал Анна Сивцева Чурапчы көһөрүллүүтүн устуоруйатын сиһилии сырдатта. Чурапчы Дириҥиттэн төрүттээх, кийиит, үлэ бэтэрээнэ Татьяна Герасимова төрөпүттэрин туһунан ахтан- санаан ааста уонна Чурапчы тулуурдаах, дьулуурдаах дьонугар анаабыт хоһоонун ааҕан иһитиннэрдэ. 1980 с. сыллаахха кийииттии кэлэн баран олохсуйа хаалбыт элбэх оҕо ийэтэ, эбээтэ Наталья Гуляева төрөппүттэрин туһунан бэрт интэриэһинэй түгэни кэпсээбитин сэҥээрэн иһиттилэр. Олохтоох библиотека үлэһитэ, «Утум» түмсүү салайааччыта Мария Обутова чурапчыттан сыдьааннаах нэһилиэкпитигэр олохсуйбут ыччаттары, кийииттэри, күтүөттэри сырдатта. Көһөрүллүү кыттыылааҕа, сэрии кэмин оҕото — ийэтин, Акулина Ивановна туһунан билиһиннэрдэ.
Түмүктүүр тылы Сардаана Анатольевна олус долгуйан туран Сииттэ дьонугар- сэргэтигэр махталын тиэртэ, олус баай ис хоһоонноох тэрээһиннэр ыытыллан, элбэҕи биллибит, көрдүбүт диэн бэлиэтээтэ, санаатын үллэһиннэ. Уонна тэрээһин түмүгэр В.Е. Колмогоров аатынан оскуолабыт 5-ис кылааһын үөрэнээччитигэр Вася Гуляевка «Мин дьиэ кэргэним историята Аҕа дойду сэриитин историятыгар» диэн дакылаатынан (сал. А.Л. Сивцева, М.А. Яковлева) Кыайыы 80 сылыгар аналлаахРеспубликанскай патриотическай форумҥа көхтөөхтүк кыттыбытын иһин Махтал суругу уонна 8-ыс кылаас үөрэнээччитигэр Ньургун Сивцевкэ «Генеология моей семьи «Республиканскай научнай-чинчийэр үлэҕэ, патриотическай форумҥа «Моя семья в истории Отечества» диэн суруйбут дакылаатыгар (сал. А. Л. Сивцева) 2 истиэпэннээх Диплому, итиэннэ «Бэс чагда» санаторийга сынньанарыгар сертификаты туттарда.
Ити курдук, нэһилиэкпитигэр Кыайыы 80 сылын көрсө биир баай ис хоһоонноох тэрээһин буолан ааста. Бары ыытыллыбыт тэрээһиннэр сыалларын-соруктарын ситистилэр диэн кэлбит ыалдьыттарбыт астынан бардылар. Чурапчы көһөрүллүүтэ Саха сирин сэрии кэминээҕи историятын биир иэдээннээх түгэнинэн буолар. Ол туһунан кэлэр көлүөнэ ыччаттар билэллэригэр инникитин да маннык иитэр- үөрэтэр үлэлэр салҕанан барыахтара диэн санаалаах тэрээһиммитин түмүктээтибит.
Мария Обутова, Сииттэ нэһилиэгэ.