Кэбээйитээҕи Е.Е. Эверстов аатынан орто оскуола оҕону иитиигэ-үөрэтиигэ бэйэтэ туспа хатыламмат үгэстэрдээх. Ол курдук, сылын аайы үгэскэ кубулуйбут оскуоланы бүтэрээччилэр айар түһүлгэлэрин кэнсиэрин тэрийэн ыыталлар.
Быйыл 2025 сылга — 25 оскуоланы бүтэрэр көрдөөх-нардаах уолаттар, кыргыттар иэйиилээх, долгутуулаах ырыаларын, үҥкүүлэрин күндү көрөөччүлэригэр, төрөппүттэригэр анаатылар. Кылаас салайааччылара — Майя Анатольевна Терехова, Анна Петровна Левина үөрэнээччилэрин кытта бииргэ сүүрэн-көтөн кэнсиэр ситиһиилээхтик барарыгар үлэлэстилэр.
Ол курдук, кэнсиэр “Кэбээйи” гимн ырыатыгар, уопсай хор толоруутунан саҕаланна. Кыайыы 80 сылын көрсө, Аҕа дойдуну көмүскээччилэр сылларыгар аналлаах “Синий платочек” үҥкүү, “Господа офицеры” ырыа ананна. Сыанаҕа бииртэн – биир ылбаҕай ырыалар ылланнылар, көрдөөх сценкалары оонньоон көрөөччүлэр дохсун ытыс тыастарынан доҕуһуолланна. 11 сыл устатын тухары оҕолорбут учууталларын үтүө сүбэлэринэн, амарах сыһыаннарынан иитиллэн майгы-сигили өттүнэн ситтилэр-хоттулар. Күн бүгүнүгэр диэри кинилэр тустарыгар долгуйар, кыһаллар, кыра да ситиһиилэриттэн үөрэр дьоно төрөппүттэрэ, эмиэ бу кэнсиэркэ кыттыыны ыллылар. Олортон ааттыыр буоллахха, көмүс куоластаах — Галина Терехова, кылаас актыыбынай төрөппүтэ — Валерий Кривошапкин, көр-күлүү маастардара – Саргылана Максимова, Петр Дьяконов, төрөппүттэр үҥкүүһүттэрин бөлөхтөрө мустубут дьон биһирэбилин ыллылар.
Оҕолорбутугар аламай күн сардаҥаларын, күөх халлаан күлүмүн бэлэхтээтин – диэн баҕа санаабытын тиэрдэбит. Санаа хоту оскуолаҕытын бүтэрэн, сөбүлүүр идэҕитин баһылаан, үлэһит үтүөтэ буолан тахсаргытыгар баҕарабыт.
«Сайдам» норуот айымньытын киинэ