Тыайаҕа «Кэнчээри» уһуйаан үлэһиттэрэ өрүү аһымал тэрээһиннэргэ көхтөөхтүк кыттарын ааһан, туспа эмиэ ураты киэһэлэри, сынньалаҥнары тэрийэр. Бу сырыыга профсоюз салайааччыта Прасковья Алексеевна Дьяконов, уһуйаан салайааччыта Анна Алексеевна Ивановалыын көҕүлээн, минньигэс ас атыылаах концерт тэрийдилэр.
Концертарыгар төрөппүттэрэ кыттан, бэрт сонун буолла. Ол курдук, төрөппүт Софья Васильевна Семенова чуор куолаһа нүөмэрдэри биллэриитэ өрө көтөҕүүнү түстүүр. Фельдшер Нюргуйаана Петровна Дьяконова сценкаларга оонньуура быарбыт ыалдьыар диэри күллэрдэ. Онтон үлэһиттэр намчы үҥкүүлэрэ, ылбаҕай ырыалара өрүү да буоларыныы, ытыс тыаһынан доҕуһуолланна. Антонина Григорьевна сонун оонньууларыгар үлэһиттэр туруорбут сыаналаах бириистэрэ үөрүү түгэннэрин көрөөччүлэргэ бэлэхтээтэ.
Бу тэрээһиҥҥэ киирбитэ харчыны нэһилиэкпит олоҥхо ыһыаҕар туттарыгар анаан, бэйэлэрин кылааттарын киллэрэн дьон-сэргэ хайҕалын туттулар.
Екатерина Архипова