Аҕа дойду Улуу сэриитин сылларыгар Чурапчы улууһа ордук улахан охсууну ылыыта күн бүгүҥҥэ диэри — оспот сүрэх бааһа, үйэлэргэ умнуллубат улуу кутурҕан.
Көһөрүүгэ биһиги кыра бөһүөлэкпитигэр 234 киһилээх, 97 хаһаайыстыбалаах “Орджоникидзе” колхуос, “Кальвица” балык артыалыгар көһөрүллэн кэлбитэ.
Билигин республика үрдүнэн Көһөрүллүү кэмин, кыттыылаахтарын үйэтитии үлэтэ тохтообокко бара турар. Улуу Кыайыы 80 үбүлүөйдээх сылынан уонна Чурапчы көһөрүллүүтүн кыттыылаахтарын ааттарын үйэтитэр үлэлэргэ кыттыһан, Екатерина Васильевна Гуляева көҕүлээһининэн, Григорий Петрович Петухов, Павел Семенович Спиридонов уонна Иосиф Егорович Гуляев өйөбүллэринэн, биһиги нэһилиэкпитигэр Өйдөбүнньүк мэҥэ таас арыллыытын дьоро түгэнэ үүннэ.
Чурапчы көһөрүллүүтүн кыттыылаахтара Кальвица нэһилиэгэр көһөн кэлэннэр, аллараа бөһүөлэккэ олорбуттар. Кинилэр “Бабаҕалар” диэн кинигэҕэ Азаровтар, Гуляевтар, Дьяконовтар-Старостиннар дьиэ кэргэннэрэ элбэхтэ, махтал мааны тылларынан ахтыллаллар.
Кальвицаҕа кэлбит “Орджоникидзе” колхуос дьонун-сэргэтин аатын үйэтитэр мэҥэ таас оҥоһуллуута – эрэйи-сору эҥэрдэринэн тэлбит дьоммутугар ытык кэриэстэбил, үйэлээх өйдөбүл бэлиэтэ буолар.
Мэнэ таас лиэнтэтин үөрүүлээх быһыыга майгыга кырыйдылар Лев Николавевич Павлов, Екатерина Васильевна Гуляева, Григорий Петрович Петухов.
Бэйэлэрин истиҥ эҕэрдэлэрин мустубут дьонно тириэртилэр «Куокуй нэһилиэгэ» муниципальнай тэриллии аҕа баһылыга Лев Николаевич Павлов, өйдөбүнньүк мэнэ таас туруорааһын көҕүлээччитэ Гуляева Екатерина Васильевна. Кини «Орджоникидзе» холкуос сыдьааннара хаалларбыт Одьулунтан дойдуларын буорун мэҥэ тааска кутта.
Алтынньы 3 күнэ биһиги сэлиэнньэбитигэр икки төгүл үөрүүлээх буолла. 2024 сыллаахха «Поддержка местных инициатив программа» чэрчитинэн тутуллубут спортивнай былаһаакка тутуллан үлэҕэ киирдэ. Кистэлэҥ буолбатах, билигин цифровой үйэҕэ, үүнэр көлүөнэ бука бары таһырдьа оонньууру, сүүрэри-көтөрү телефон, компьютер иннигэр олорорго уларытта. Онтон оҕону сааратар, аралдьытар бу курдук былаһааккалар биһиэхэ эрэ буолбакка, бүтүн республика, Россия үрдүнэн арыллаллара кэрэхсэбиллээх.
Кэнчээри ыччаппыт оонньуур, сайдар былаһаакката үүнэ-сайда турарыгар үрдүк айыыларбытыгар алгыс тылын анааһынтан саҕаланна. Эҕэрдэ тылларын «Куокуй нэһилиэгэ» муниципальнай тэриллии аҕа баһылыгар Лев Николаевич Павлов эттэ, ону тэҥэ Кальвица оскуолатын директора Ирина Петровна Сивцева.
Биир дойдулаахпыт А.А. Павлов биригээдэтэ бу сайын кэлэннэр, кылгас кэм иһигэр тигинэччи үлэлээн-хамсаан, бөҕө-таҕа гына тутан былаһааккабыт бу күн үлэҕэ киирэн олохтоохтор үөрүүбүт муҥура суох.
Кыратыттан улаханыгар диэри саастаах оҕолорго бу курдук былаһааккалар “ыҥырыы” кэриэтэ буоллахтара, дьиэ таһыгар турара, араас дьарыктанарга аналлаах оҥоһуктар бааллара оҕону көҕүлүүр, кыраттан да буоллар спортка угуйар диэтэхпитинэ сыыспаппыт буолуо.
Бу курдук үөрүүлээх түгэннэр Кальвица сэлиэнньэтигэр буола турдуннар, былааннаммыт үлэлэр олоххо киирдиннэр.
«Алгыс» норуот айымньытын киинэ