Быйыл буойун учуутал, советскай-партийнай үлэ ветерана, Нам, Кэбээйи улуустарын бочуоттаах олохтооҕо, кыраайы үөрэтээччи Колмогоров В. Е. аатынан Сииттэ орто оскуолата төрүттэммитэ 95 сыллаах үбүлүөйүн бу үөрэх дьылыгар туолар. Онон сиэттэрэн араас темалаах тэрээһиннэр оскуолабытыгар ыытыллаллар. Ол курдук биһиги оскуолабытыгар В. Е. Колмогоров аатынан пионерскай дружина тохсус сылын үлэлиир уонна сылын аайы 5 кылаастары пионерга ылабыт.
Ол курдук быйылгы пионерскай этэрээт оскуолабытын бастакынан соҕотоҕун 3-с кылааһы бүтэрбит, Саха АССР төрүттэммитэ 10 сылынан 1932 сыллаахха ыытыллыбыт республиканскай пионерскай сүлүөккэ кыттыыны ылбыт, Василий Егорович бииргэ төрөөбүт убайа Григорий Егорович Колмогоров аатын быйылгы пионердар чиэстээхтик сүгэр буоллулар.
Бэһис кылаастар салайааччылара Сайыына Васильевна Назаренко үөрэнээччилэригэр Григорий Егорович олоҕун, үлэтин туһунан билиһиннэрэр кылаас чааһын ыыппыта. Ол кэннэ алтынньы 21 күнүгэр дружина сборугар «Ситим» кыраайы үөрэтэр куруһуок салайааччыта бары пионердарга, ыалдьыттарга уонна учууталларга билиһиннэрбитэ.
Григорий Егорович 7-с кылааһы Намҥа бүтэрэн баран, Сииттэҕэ сельсовет секретарынан үлэлии сырыттаҕына 1937 сыллаахха комсомолецтары, эдэр эрчимнээх ыччаттары Саха байыаннай оскуолатыгар үөрэттэрэргэ сурук кэлбит. Григорий Егоровиһы бу оскуолаҕа үөрэттэрэ ыыппыттар. Быйыл саха биллиилээх суруйааччыта, учуонай, государственнай деятель П. А. Ойуунускай Саха сиригэр байыаннай оскуоланы тэрийбитэ 100 сылын туолла.
Онон Сииттэбит начаалынай оскуолатын бүтэрбит, үлэ, тыыл ветерана, Нам улууһун ытык киһитэ Колмогоров Григорий Егорович үтүө аата нэһилиэкпитигэр, үөрэммит оскуолатыгар ааттанарыттан киэн туттабыт, үөрэбит. Кини олорбут олоҕо, үлэтэ биһиэхэ үтүө холобур буолар.
Гуляева Ира, В. Е. Колмогоров аатынан Сииттэ орто оскуолатын 10 кылааһын үөрэнээччитэ