Ыам ыйын 25 күнүгэр аар тойон айбыт айылҕа уһуктар саҕахтаах, күн тахсар дьиктилээх көстүүлээх, кэҕэ кыыл чоргуйар куоластаах саргылаах олоҕу түстээччи, сайаҕас санаалаах дьоннордоох, сиэдэрэй көстүүнэн симэммитСиэгэммитигэр — култуура сынньанар дьиэтин саалатын иһэ толору көрөөччүнэн туолла. Үөрүү-көтүү, күлсүү-салсыы,сүпсүлгэн-ипсилгэн саала иһин ылан кэбисистэ.
Бу кэрэ күнү олус үөрүүлээхтик, долгутуулаахтык, бар дьонун муһан, үҥкүү-ырыа кэһиилээх алыптаах киэһэтин үбүлүөйүн көрсө бэлэх уунна , улуус, республика киэн туонатыгар Сиэгэн –Күөл бөһүөлэгин аар-саарга ааттаппыт биһиги оҕобут, талааннаах хореограф, Саха Республикатын үөрэҕириитин уонна култуураҕа туйгуннара, Российскай Федерация уопсай үөрэхтээһинин туйгуна, 2004 сылтан«Ньургуһун» образцовай оҕо үҥкүү ансаамбылын салайааччыта Семен Николаевич Старостин.
Быыс аһылла түһээтин кытта, ытыс тыаһыгардоҕуһуоллатан, сахалыы дььиэрэҥкэйдээн, Семен Николаевич кырачаан оторой-моторой үҥкүүһүт уолаттарын кытта, тэбис тэҥҥэ сыанаҕа биирдэ баар буола түстүлэр! Кырачаан үҥкүүһүттэр уһуйааччыларын хас биирдии хамсаныытын биир сап ситимигэр тиһэн, тэйиэккэлээн барбыттара, хайдахтаахкурдук кэрэний, долгутуулааҕый !!!
Ити көрө олорон уруккуну-хойуккуну санаан кэллим… 2004 сыл кулун тутар ый саҥатыгр Семен Николаевич төрөөбүтСиэгэнигэр кэлэн, (оччолого идэтийбит үҥкүүһүт, Саха Республикатын Кыыл Уолун аатынан үҥкүү театрыгар үҥкүүһүт идэтинэн үлэлии сылдьан) үөрэммит оскуолатыгар үлэлии киирбитэ. Ити сыл “Ньургуһун” үҥкүү бөлөҕүн тэрийэн үлэ-хамнас үөһүгэр түспүтэ. Эдэр үлэһит олус былааннаахтык үлэлиирин, ылсыбыт дьыалатыгар ирдэбиллээҕин бары бэлиэтии көрбүппүт. Семен Николаевич кэлиэҕиттэн бөһүөлэкпит култуурунай сайдыытыгар биллэ-көстө , харахха быраҕыллар уларыйыылар, сэргэхсийиилэр барбыттара. Бөһүөлэкпит ааҕан сиппэт кэрэчээн кыргыттарын үҥкүү абылыҥар сирдээн, араас куонкурстарга кытыннаран, дойду ис –тас муннуктарыгар сырытыннаран, төһөлөөх умнуллубат түгэни бэлэхтээбитэ буолуой?… Бастакы бөлөх кыргыттарынаан киэҥ эйгэ дьүүлүгэр турбут, биһирэммит үҥкүүлэрин туруорбута… Хас биирдии үҥкүү туһунан остуоруйалаах , хас биирдии үҥкүү ураты абылаҥнаах хамсаныылаах…(“изюминка”)...
Бу да киэһэ Семен Старостин хас да саҥа үҥкүүтэ “бравооо”хаһыынан, уостубат ытыс тыаһынан доҕуһуолланнылар… Үҥкүүһүт сольнай үҥкүүтүн таһынан, үөрүүлээх күнүн тэҥҥэ үөрэ –көтө үллэстэ кэлбит ыалдьыттарыгар “Дьол тааһа” ырыатын бэлэх ууммута, Семен талааныгар сүгүрүйээччилэргэ, биир дойдулаахтарыгар биир умнуллубат түгэн буолла.
Юбилярга алгыстаах ырыа кэһиилээх кэлэн эҕэрдэлээтилэр:бөһүөлэкпит өссө биир киэн туттуута «Ча5ылыс» образцовай оҕо ырыа ансаамбыла ырыаһыттара (уһуйааччы Саха Республикатын үөрэҕэриитин , Российскай Федерация уопсай уорэ5иритин туйгуннара бэлиэ хаьаайына- Альбина Бессонова), норуоту ырыатынан алҕаатылар “ Айылгы” фольклорнай куруһуок иитиллээччилэр (уһуйааччы- Антонина Бессонова), бөһүөлэкпит киэн туттар ырыаһыта Валентин Слепцов, коллегата Варвара Иванова. Маны таһынан, Семен Николаевичка күүс-көмө буоллулар “Ньургуһун” образцовай үҥкүү ансаабылын «тоҥ буору» тобулан тахсан иһэр кырачаан үнүгэсчээннэрэ, араас сыллаах выпускниктара, Сиэгэн-Күөл орто оскуолатын эдэр учууталлара. Бүгүҥҥү киэһэ үөрүүлээх түгэнинэн юбиляр Семен Николаевич Старостин кэрэ бэлиэкүнүн минньигэс туорду кэлбит дьон бары сүһүөхтэригэр туран ытыс тыаһынан көрсүбүттэрэ буолла. Бу киэһэ кулууп дьиэтиттэн олохтоохтор сүргэлэрэ көтөҕүллэн, үҥкүү абылаҥар уйдаран олус астынан, үөрэн-көтөн тарҕастылар.
Түгэнинэн туһанан, талааннаах ыччаппыт, киэн туттуубут Семен Николаевич Старостин үбүлүөйдээх киэһэтин кэнсиэригэр Сиэгэн-Күөл киэҥ туонатыгар- өрөгөйүн түһүлгэтигэр үтүө –мааны ыалдьыт буолан,сылаастык көрсөн, ытыскыт тыаһынан доҕуһуоллаабыт,өйөөбүт-убаабыт биир дойдулаахтарбар ис сүрэхтэн барыгытыгар-Махтал, урааҥхайдыы уйа5ас –Уруй, сахалыы сайаҕас-Айхал!
Оттон Семен Николаевичка, мустубут көрөөччүлэрбит уонна тус бэйэм, дьиэ кэргэним, хаан-уруу аймахтарыҥ ааттарыттан баҕарыам этэ, саха алмааһыны доруобай буол, айымньылаах үлэҥ өссө да үллэ-балла турдун, элбэх талааннаах үҥкүүһүтү таһааран , бөһүөлэкпитин ааттата тур!
Прасковья Макарова, Сиэгэн-Күөл орто оскуолатын учуутала