Муус устар 2 күнүгэр Кэбээйи нэһилиэгэр киин куораттан “Айар кутум абылаҥа” диэн киэҥ программалаах уран тыллаах поэттар түмсүүлэрэ кэлэн бардылар.
Поэттар кэккэлэригэр биир дойдулаахпыт эдэр, саҕалаан эрэр поэт, былырыыҥҥы оскуолабыт выпускнига Лепчиков Денис баара үөрдэр. Кинини аҕа табаарыстара иилээн-саҕалаан илдьэ сылдьалларыттан үөрэбит. Бу литературнай түмсүүнү Саха сирин суруйааччыларын союһун чилиэнэ, поэт Раиса Николаевна Тимофеева – Сырдык Күүс салайар.
Иэйии аргыстаах ыалдьыттарбытын Норуот маастара Елизавета Константиновна Софронеева сахалыы тыыннаах балаҕаныгар сылаас чэйдээх, минньигэс алаадьылаах, астаах-үөллээх көрүстэ, ирэ-хоро сэһэргэстэ.
Салгыы түмсүү кыттыылаахтара оҕо-аймах уйатыгар Кэбээйи орто оскуолатыгар үөрэнээччилэри кытары көрүстүлэр, улуус историятын кэрэһэлиир Кэбээйитээҕи кыраайы үөрэтэр түмэлгэ экскурсияҕа сырыттылар, 3 уһуйаан кырачаан иитээччилэригэр ыалдьыттаатылар. Сылдьыбыт тэрилтэлэригэр бэйэлэрин хоһооннорун аахтылар, хомуурунньуктарын бэлэх ууннулар.
Күнүс 4 чаастан биир долгуҥҥа уйдарар Кэбээйи нэһилиэгин түмэлбит сүрүн харайааччыта И. Г. Кобяков салайааччылаах «Кулуһун кут» литературнай түмсүү поэттарын кытары Г. Г. Кобяков аатынан модельнай библиотекаҕа истиҥ-иһирэх көрсүһүүгэ кытыннылар.
Тыл хомуһуна айдарыылаах хоһоонньуттарбыт айымньыларын ааҕан, санаа атастаһан, инникитин бииргэ үлэлэһэр туһунан сүбэлэстилэр.
Айталина Максимова, түмэл үлэһитэ.