Сииттэ нэһилиэгэр Улуу Өктөөп революциятын 107 сылын туолар үөрүүлээх бырааһынньыгын тэрээһинэ буолан ааста.
Тэрээһиҥҥэ олохтоох дьаһалта, култуура үлэһиттэрэ, Сииттэ орто оскуолатын үөрэнээччилэрэ, учууталлара, балыыһа коллектива көхтөөх кыттыыны ыллылар. Миитини иилээн — саҕалаан олохтоох библиотека сэбиэдиссэйэ Мария Обутова ыытта. Улуу өктөөбү уруйдуур хомуһуннаах хоһооннорунан култуура үлэһиттэрэ Евдокия Охлопкова, Марианна Сивцева арыйдылар. Олохтоох дьаһалта аатыттан эҕэрдэ тылы тириэртэ Мария Захарова, Сииттэ орто оскуолатын учуутала Захар Кривошапкин Өктөөп бырааһынньыгын историятын билиһиннэрдэ. Тэрээһин түмүк тылын этэн баҕа санаатын тириэртэ 9 кылаас үөрэнээччитэ, Сииттэ орто оскуолатын президена Виолетта Сергеева.
«Былааһы сэбиэккэ!» ырыаны өрө күүрүүлээхтик ыллаан тэрээһиммитин түмүктээтибит.
Марианна Сивцева
