Кулун тутар 30 күнүгэр Кэбээйи нэһилиэгэр П.Д. Степанов аатынан улуустааҕы кыраайы үөрэтэр түмэл 65 сылыгар аналлаах тэрээһин буолла.
Юбилей тэрээһинэ «Күбэйэ» эбээлэр түмсүүлэрэ алгыстарынан саҕаланна. Ыалдьыттарбытын, кыттааччыларбытын экскурсовод А. А. Максимова кэритэ сылдьан экспонаттарбытын кытары билиһиннэрдэ, итини тэҥинэн «Харыстаана» коллекционердар түмсүүлэрэ, «Иис тойуга» нэһилиэк иистэнньэҥнэрин выставкалара турдулар.
Директор Г. К. Егоров бэйэтин этиитигэр түмэл 5 сыл үлэтин кылгастык билиһиннэрдэ. 2023 с. түмэл «Культура» федеральнай программаҕа киирсэн капитальнай ремоны барда, быйыл «Техоснащение» проекка кыттан 1,5 мөл. солк. курдук сууммаҕа интерактивнай панель, книжнай сканер, компьютернай оборудование, зеркальнай фотоаппарат, колонка ылыахтаах, витриналары. Музейы бэлэмниир үрдүк үөрэх тэрилтэлэрин бүтэрэн И. Г. Кобяков — фонда сүрүн харайааччыта «Музей үлэтин тэрийии», экскурсовод А. А. Максимова «Музей научнай үлэһитэ» идэни баһылаатылар.
Көрөөччүлэр ахсааннарын элбэтэр сыалтан үлэ араас көрүҥнэрин ыытабыт, 2022 с. музейдар федеральнай каталогтарыгар киирдибит, 1200 тахса экспонаты государственнай реестргэ киллэрдибит. Билигин да 5000 тахса экспонат учуокка туруохтаах.
Үөрүүлээх чааспытыгар улууспут Аҕа баһылыга И. И. Левин, Ил Түмэн депутата А. В. Сусоев, нэһилиэкпит баһылыга И. И. Левин уонна тэрилтэ салайааччылара, общественнай холбоһуктар, урбаанньыттар эҕэрдэлээтилэр, бэлэх-туһах туттардылар.
Юбилейбыт долгутуулаах түгэнинэн тэрээһиммит күүтүүлээх ыалдьыттара — 1957-58 сс. түмэлбит тэрийээччитэ П. Д. Степанов тэрийбит «Эдэр историк» куруһуок кыттыылаахтара, бастакыннан элбэх экспонаттары хомуйбут, былыргы сэһэннэри, номохтору сурукка киллэрэн үлэлэспит — Г. К. Эверстов, Т. В. Полятинская, С. Н. Тимофеев, И. Г. Афанасьев кыттыбыттара буолар.
Элбэх үтүө тыллар, баҕа санаалар этилиннилэр, ыалдьыттарбыт түмэл тупсубутун, экспонаттара элбээбитин бэлиэтээтилэр.
Ити курдук түмэл коллектива бары биир киһи курдук турунан, юбилейбытын тэрээһиннээхтик ыыттыбыт, инникитин да үлэ үөһүгэр сылдьарга, үлэ саҥа көрүҥнэрин киллэрэргэ бэлэммит.
Түмэл директора Григорий Егоров.