Сардаана Афанасьевна Плотникова салайааччылаах «Төлкө түөрэҕэ» биэрии устар бөлөҕө Кэбээйи нэһилиэгэр кэлэ сырытта. Кэбээйи олохтооҕо Андрей Филиппович Терехов прототип буолан суруйааччы Суорун Омоллоон «Күкүр Уус» драматыгар киирбитин республикабыт олохтоохторо Е.М. Ярославскай аатынан Хотугу норуоттар историяларын уонна культураларын холбоһуктаах түмэлигэр тэриллибит «Сэдэх экспонаттар» выставкаҕа билбиттэрэ. «Күкүр Уус» драма прототиптара» диэн “В контакте” олунньу 28 күнүнээҕи таһаарыыбытыгар Кэбээйи олохтоохторо драмаҕа прототип быһыытынан киирбиттэрин сиһилии суруйан турардаахпыт. «Төлкө түөрэҕэ» биэриитигэр анаан Күкүр уус оҥорбут түмэлгэ харалла сытар оҥоһуктарын кытта экскурсовод Айталина Анатольевна Максимова билиһиннэрдэ.
Т.Е. Сметанин 1938-1939 сыллардаахха Кэбээйигэ «Күкүр уус» драматын туруоруутугар оонньообутун туһунан түмэл сүрүн харайааччыта И.Г. Кобяков кэпсээтэ. Т. Е. Сметанин аатынан Кэбээйитээҕи народнай театр артыыстара «Күкүр Уус» драматтан быһа тардыыны көрдөрдүлэр. Нэһилиэк ветераннарын сүбэтин салайааччыта, биһиги түмэлбитин өр кэмҥэ салайбыт Е.А. Павлов Суорун Омоллоон Кэбээйигэ сырыытын туһунан сэһэргээтэ. Кырдьаҕас краевед, култуура үлэһитэ С.Н. Тимофеев Күкүр Уус туһунан кэпсээтэ. Онтон Күкүр Уус сыдьааннарын туһунан сиэннэрэ Т.И. Терехова уонна С.С. Константинова сиһилии кэпсээтилэр.
Ити курдук Сардаана Плотникова салайааччылаах «Төлкө түөрэҕэ» айар бөлөххө Күкүр Уус аатын киэҥ араҥаҕа таһааран билиһиннэрэллэригэр кэбээйилэр ааттарыттан барҕа махтал тылларын этэбит!
Айталина Максимова, түмэл үлэһитэ.