Сииттэбит нэһилиэгэр чөл олоҕу өрө тутар сыалтан, араас хабааннаах спортивнай күрэхтэр элбэхтик буолаллар. Тэрээһиннэргэ ыччаттарбыт, оҕолорбут үөрэ — көтө, көхтөөх кыттыыны ылалларыттан олус үөрэбит уонна астынабыт. Ити аата инники көлүөнэ ыччаттарбыт сырдыкка, кэрэҕэ тардыһаллара күүстээх эбит диэн сыаналыаҕы баҕарыллар.
Нэһилиэкпит ортотугар сөп түбэһиннэрэн, олохтоохтор кэлэ — бара дьарыктанан, доруобуйаларын тупсардыннар диэн спортивнай площадкабыт аана өрүү аһаҕас. Оҕолорбут, ыччаттарбыт бука бары мустан, оонньоон — көрүлээн, дьарыктанан, сынньанан ааһалларын көрөр олус бэртээхэй суол. Ол чэрчитинэн бүгүн нэһилиэкпитигэр футбол оонньуутугар улахан күрэх буолан ааста.
Нэһилиэкпит эдэр ыччаттара Иван Сивцев уонна Никита Павлов көҕүлээн, тэрийэн ыыттылар. Күрэхпитигэр көрөөччулэрдиин, кыттааччылардыын барыта 50 киһи баара олус үөртэ, долгутта. Оҕолор 4 хамаанданнан хайдыһан күрэхтэстилэр. Оонньуубут олус тыҥааһыннаахтык ааста, бары кыайыы көтөллөнүөхтэрин баҕараллара аһаҕастык көстөр, сытыы киирсиилээх оонньуулары астына — дуоһуйа көрдүбүт.
Күрэх түмүгүнэн Адам Аргунов хамаандата бастакы миэстэни, иккис миэстэни — Лева Попов, уһус миэстэни — Дима Павлов уонна төрдус миэстэни Салим Расулов хамаандалара тутаннар, тэрийээччилэр анал грамоталарынан наҕараадалаатылар.
Оҕолорбутугар, ыччаттарбытыгар ити курдук успуорду ере тутан доруобай, дьоллоох буолун диэн алгыс тыл маанытын аныыбыт, көхтөөх кыттыыны ылбыттарыгар махтанабыт.
Марианна Сивцева