Быйыл РФ Учуутал уонна Уһуйааччы сыла. Учуутал-муңутуур күүс суолдьута, учуутал – өркөн өй өрөгөйүн арыалдьыта. Учууталга махтал, учууталга таптал хаһан да сүппэт. Ол курдук саха народнай суруйааччыта, «Алжир на перекрестках культуры» Аан дойдутааҕы литературнай бириэмийэ лауреата, «Алаш» литературнай бириэмийэ лауреата, Саха Республикатын үтүөлээх деятелэ, ССРС суруйааччыларын союһун чилиэнэ, биир дойдулаахпыт Николай Алексеевич Лугинов бастакы учууталын Анна Ивановна Окурова туһунан
«Сырдыгы сахпыт үтүө учуутал» диэн Анна Ивановна туһунан дакылааппар ахтыы суруйбутун ааҕааччыларга тиэрдиэхпин баҕардым. «Анна Ивановна Тыайаҕа 1955 сыллаахха мин 1 кылааска киирэрбэр үлэлии кэлбитэ. Бу иннинэ нулевой кылааска үөрэммитим. Онно хайдах эрэ соччото суох үөрэммитим. Анна Ивановна сырдыгынан сыдьаайбыт, үтүө санаалаах, холку, истиң, наһаа үчүгэй учуутал этэ. Мин улаханнык мэниктээбэт этим, оскуолабар үөрэ- көтө кэлэрим. Үөрэхпэр үчүгэй этим. Кинини кытта Дьяконова Акулина Ильинична саха тылын учууталынан, Жирков Иннокентий Иннокентьевич (билигин СВФУ-га БГФ үлэлиир, наука доктора) үлэлии кэлэн, ис- истэриттэн сырдаан, үөрэҕи, сайдыыны биһиги Тыайабытыгар аҕалбыттара. Кинилэр үөрэппит оҕолоруттан элбэх оҕо үөрэхтэнэн араас салааҕа үлэлээбиттэрэ. Холобура: Полятинскай Иннокентий Алексеевич — полковник, Польшаҕа секретнэй чаас командира, кэлин республикаҕа МЧС министирэ буолбута. Полятинскай Николай Егорович – республика прокурора буолбута. Бу Анна Ивановна үөрэппит оҕолоро этилэр.Үчүгэй дьон сабыдыалларынан Тыайаттан элбэх үтүөлээх быраастар, учууталлар,учуонайдар, салайааччылар иитиллэн тахсыбыттара. Бу барыта учуутал уһулуччу үлэтиттэн сибээстээх. Кинилэр наһаа улахан сабыдыаллаахтар, үтүө да санаалаах этилэр. Бу учууталлары кытта таайым Петров Иван Романович хаайыыттан кэлэн үлэлээбитэ. Кэлин кини Кэбээйигэ үлэлээбитэ.
Учууталбын сүтэрэн кэбиспитим. Онтум 1959 сылтан 1964 сылга диэри Сииттэҕэ үлэлээбит эбит. Кэлин учууталбын кытта суруйсар этим. Олус үөрэн суруйара. Хомойуох иһин, тыыннааҕар көрсүбэтэҕим. Учууталым туһунан сырдык өйдөбүлү олоҕум устата илдьэ сылдьабын уонна наһаа истиңник махтана саныыбын».
Дьэ, ити курдук, Кэбээйи улууһугар Тыайаҕа, Сииттэҕэ элбэх үтүө дьону иитэн таһаарбыт учуутал Окурова Анна Ивановна аата умнуллубакка көлүөнэттэн көлүөнэҕэ тиэрдиллэн иһиэ, кини төрөппүт оҕолоро, сиэннэрэ ийэлэринэн, эбээлэринэн киэн тутта, кини олоҕун салҕаан бу олоххо этэңңэ суолларын – иистэрин хаалларан олоруохтара диэн бигэ эрэллээхпин.
Валерия Ноговицына – Сииттэ орто оскуолатын выпускнига