Сииттэбит нэһилиэгэр атын нэһилиэктэр курдук үлэ — үөрэх күөстүү оргуйарыттан, күннээҕи түбүк бүппэтиттэн, халлаан сылыйан оҕо — аймах уулуссаҕа оонньууруттан, ынах — сүөһү маҕыраһан айаттыылларыттан, массыыналар бирилэһэн ааһар тыастарыттан ордук күндү бу орто дойдуга туох да суох диэн сыаналыҕы баҕарыллар. Ханнык баҕар түгэҥҥэ олох салҕанар дииллэрэ кырдьык даҕаны, бу барыта дьол.
Сииттэбит бөһүөлэгэр улахан, үөрүүлээх сонуммутун биир дойдулаахтарбытын кытта үллэстээри суруйдум. Ол курдук, улууспут баһылыга Иван Левин уонна олохтоох баһылык Семен Тимофеев хамаандаларын, сыралаах кэпсэтиилэр түмүктэринэн, Сииттэбит нэһилиэгэр таас детсад дэндэйэрэ күүтүллэр. 2024 сылтан күүстээх үлэтэ саҕаланан 2027 сылга түмүктэниэхтээх диэн улахан эрэл кыыма баарыттан олус долгуйдубут, дьоллоннубут.
Номнуо детсад тутуллар миэстэтигэр изыскательнай үлэлэри ООО «Сахакриоцентр» икки үлэһиттэрэ кэлэн, үс күн күргүөмнээх хамсааһыннары ыытан бардылар. Онон сииттэлэр эрэл кыыма сахпытынан, бөһүөлэкпитигэр сайдыы баран иһэриттэн олус астына — дуоһуйа сылдьалларын көрөн киһи санаата көтөҕүллэр, дууһата манньыйар.
Аны бу күннэргэ тобус толору ГСМ тиэйиилээх камаз массыына кэлэн нэһилиэкпитин эмиэ сэргэхситтэ. Ол курдук, 8 туонна бензин, 9 туонна сэлээркэни улахан субботник тэрийэн эр хоһууттар көрүөх бэтэрээ өттүгэр сүөкээн кээстилэр. Онон оттуур — мастыыр, бултуур — алтыыр, айанныыр дьон үөрүүлэрэ олохтоох баһылыкка Семен Тимофеевичка махталлара улахан. Бу барыта улахан докумуон эккирэтиһиитинэн, толору бэйэ эппиэтинэһигэр ыларга тустаах тэрилтэни кытта улахан, уунньуктаах кэпсэтииннэн кэлэрин бары диэн бэрткэ билэбит. Тыа хаһаайыстыбатын салаатыгар уотурбаҕа, эбиэскэ, куурусса, индюк босхо тиэйэн аҕаларга олохтоох дьаһалтабыт улахан үлэлэри ыыта олороро киһини астыннарар. Эдэр специалист Дмитрий Колмогоров төбө харчыта эрэйэ суох хаһаайыстыбаларга киирэригэр, электроннай кинигэни олохтоох дьаһалта исписээлиһин Александра Иванованы кытта бу күннэргэ түмүктээн эрэллэрэ киһини үөрдэр.
Дьэ, бу курдук, Сииттэбит сиэдэрэй сирэ тугунан тыына олорорун көрдүгүт, аахтыгыт. Бука барыгытыгар ситиһиилэри эрэ баҕарабыт.
Марианна Сивцева.