Сииттэбит нэһилиэгэр олунньу 1 күнуүгэр, Кэбээйи улууһун 2023 сылга ыытыллыбыт үлэтин отчуота буолан ааста. Улуус отчуотун иилээн — саҕалаан ыытта Кэбээйи улууһун баһылыгын бастакы солбуйааччыта Александр Сивцев уонна Кэбээйи улууьун депутаттарын бэрэсэдээтэлэ Савва Афанасьев.
Айаннарыгар техникалара моһуоктаан, хойутаан да айаннааталлар, улуус тэрилтэтин салайааччылара, олохтоохтору долгутар тустаах боппуруостарыгар толору прием оҥорон, дьон улаханнык астынна, махтанна. Мунньаҕы Александр Сивцев саҕалаата, ыытыллыбыт үлэлэри хас биирдии киһи өйдүүр гына хайысхаларынан ырытан, анал таблица оҥорон проекторынан дьон көрүүтүгэр таһаарбыттара олус өйдөнүмтүө буолла.
Отчуоту толору истэн баран, олохтоохтор долгутар боппуруостарын туруорустулар, аһаҕастык ыйытыластылар. Улуус представителлэрэ боппуруостарга барытыгар сөптөөх эппиэттэри хоруйдаатылар, болҕомтоҕо ыллылар. Мунньахха кэлбит дьон аһаҕас кэпсэтиигэ көхтөөхтүк кытыннылар, баҕа санааларын толору этиннилэр. Нэһилиэктэн киирбит боппуруостары улуус салалтата протоколга киллэрэн суруннулар, сөптөөх эппиэттэри хоруйдуох буоллулар. Мунньах түмүгэр улуус дьаһалтата кыахтара баарынан үлэ — хамнас үгүөрүтүк барбытын сииттэлэр үрдүктүк бэлиэтээтилэр, сыаналаатылар. Олохтоохтор нэһилиэкпит баһылыгар Семен Тимофеевка, үлэтигэр — хамнаһыгар улуус өтүттэн күүс — көмө буолалларыгар махтал тылларын тириэртилэр.
Тэрээһиҥҥэ Сииттэбит орто оскуолатын директора Андрей Новгородов, Римма Винокурова, Наставник уонна учуутал сыла түмүктэммитинэн, үлэлэрин үрдүктүк сыаналаан, Кэбээйи улууһун үөрэҕин управлениетыттан анал знак туттулар. Анастасия Сидорова, Василиса Охлопкова, Николай Дьяконов, Анна Сивцева, Мария Яковлев, Захар Кривошапкин бочуотунай грамоталарынан биһирэннилэр. Наҕараада ылбыт оскуолабыт үлэһиттэрин итиитик — истиҥник эҕэрдэлиибит, үлэҕитигэр өссө үрдүк ситиһиилэри баҕарабыт.
2024 сылтан таас детсадпыт үлэтэ саҕаланарын истэммит улууспут баьылыгар Иван Левиҥҥа, олохтоох баһылыкпытыгар Семен Тимофеевка махтал тыл үтүөтүн тиэртибит.
Марианна Сивцева.