Сииттэлэр СВО-ҕа көмөнү салҕыыллар

Сииттэбит нэһилиэгин олохтоохторо ый аайы аттаран, былааннан быстах эпэрээссийэҕэ сылдьар биир дойдулаахтарбытыгар көмөбүтүн быспакка оҥорорбут сылтан орто. Бу кэмнэргэ дьоммут — сэргэбит ис дууһаларыттан биир да киһи туора турбакка олус көхтөөхтүк кытталлара, биир сомоҕо буоларбытын өссө төгүл туоһулаата.

Ол курдук, бу ааспыт икки нэдиэлэҕэ собо соркуойдааһынын уонна мииннииргэ ыраастаан аҕаларга акция тэриллибитэ. Олохтоохтор акцияны истээт, соболорун олохтоох дьаһалта дьиэтигэр аҕалан туттарбытынан бартара. Инньэ гынан 200 устуука собо соркуойданна, 100 устуука мииннииргэ бэлэмнэннэ. Эбэбит барахсан минньигэс соболорун биир дойдулаахтарбыт астына — дуоһуйа амсайан, дойдуларын ахтылҕанын таһаараннар, минньигэс сытын дуоһуйа сыттаан, күүстэригэр күүс, сэниэлэригэр сэниэ эбиллиэҕэ диэн эрэнэбит. Маны таһынан 50 устуука эбии оробуочай үтүлүктэри тигэн ыыттыбыт.

Көмө таһаҕаспытын олохтоох дьаһалтабыт баһылыга Семен Тимофеев тустаах сиргэ тиэрдээтин кытта, тутатына Хабаровскайга таһаҕас таһар волонтердар үөрэн — көтөн, махтанан туран ылан бардылар. Сииттэбит нэһилиэгин бары көхтөөх олохтоохторугар үтүө санааҕыт хаһан да уҕараабатыгар, аһыныгас дууһаҕыт чарааһаабатыгар баҕарабыт! Сииттэлэр өрүү биир сомоҕо буолуохайын диэн ыҥырабыт!

Марианна Сивцева.

Читайте дальше