Сииттэбит нэһилиэгин олохтоохторугар үүммүт 2024 сыл үтүөнү, кэрэни, доруобуйаны, үрдүк ситиһиилэри, дабайыылары уонна сир үрдүгэр эйэ эрэ түстэнэрин туһугар, алгыс тыл маанытын анаан туран, дойдубут дьонугар Саҥа дьыл бырааһынньыгын сылаас тыынын иҥэрэн, бэртээхэй бириистэрдээх араас күрэхтэри олохтоох дьаһалтаны кытта тэрийдибит.
Ол курдук, тарбахтарыгар талааннаах Далбар Хотуттарга «Түннүкпүтүн түүн кэлэн… » диэн түннүк киэргэтиитин күрэҕэ бэрт тыҥааһыннаахтык буолан ааста. Бу күрэхпитигэр дьиэтин алта түннүгүн көрүөхтэн кэрэ гына, олус оригинальнайдык киэргэппит Александра Степанова аата бастакы ааттанна. Элбэх оҕолоох Ольга, Егор Левиннар эмиэ түннүктэрин барытын киэргэтэн, видеоҕа устан ыыппыттара, олохтоохтор сэҥээриилэрин ылыан ылла.
Саҥа дьыл күнүгэр бырааһынньыктааҕы саалаҕа дьон тоҕуоруһа муһунна. Олохтоох дьаһалта баһылыга Семен Тимофеев Сииттэбит үбүлүөйдээх, ону тэҥэ Россияҕа Учуутал уонна наставник, республикаҕа Үлэ сылларынан бастыҥтан бастыҥ, нэьилиэкпит сайдыытыгар сүҥкэн кылааттарын киллэрсибит дьоммутугар анал юбилейнай мэдээллэри, махтал суруктары, бочуотунай грамоталары үөрүүлээх быһыыга — майгыга туттартаата. Сыл аайы буоларын курдук, элбэх номинациялар туттарыллаллара үгэскэ кубулуйда. Ол курдук, «Сыл бастыҥ байылыат ыала» — Марианна, Иван Захаровтар, «Сиэдэрэй тиэргэн» — Анна, Тимофей Тимофеевтар, «Сыл бастыҥ сүбэһитэ» Анна Сивцева, «Сыл бастыҥ көхтөөх аҕата» — Егор Левин, «Сыл бастыҥ төһүү үлэһитэ» — Степан Обутов, «Сыл бастыҥ тренера» — Иннокентий Охлопков уонна да атыттар ааттара үрдүктүк ааттанна.
Кэлбит ыалдьыттар, бар дьоммут, биир дойдулаахтарын ситиһиилэриттэн, үөрэн — көтөн туран дохсун ытыс тыаһын бэлэх ууннулар. Бырааһынньыктааҕы тэрээһиммит иккис чааһыгар, ылбаҕай ырыаны өрө туппут дуэттар эҕэрдэ ырыаларыгар үҥкүүлээн битийдибит, тэҥҥэ ыллаһан дьиэрэттибит. Көрөөччүлэр олус сэргээтилэр, сэргэхсийдилэр. Сонун тэрээһин диэн кыттааччыларга махталларын, алгыс тылларын тириэртилэр.
Улахан махталбытын тиэрдэбит көрдөһүүбүтүн ылынан, ис дууһаларын ууран туран, үлэлии — үлэлии репетициялаан, бар дьонноругар бырааһынньык абылыыр күүһүн бэлэхтээбит Анастасия Парниковаҕа, Мария Новгородоваҕа, Римма Анатольевнаҕа, Анатолий Назаренкоҕа, Николай Захаровка, Александра Ивановаҕа, Рустам Расуловка, Дмитрий Охлопковка. Инникитин эдэр ыччаттарбытыгар эрэлбит улахан диэн этиэхпитин баҕарабыт.
Марианна Сивцева.