Сииттэлэр Россия күнүн бэлиэтээтилэр

Бүгүҥҥү тэрээһиҥҥэ үүнэр ыччат оҕолорбут кэлэн, олус элбэҕи биллилэр – көрдүлэр. Ол курдук, лааҕыр салайааччылара, үлэһиттэрэ Сардана Обутова, Сардана Гуляева, Сииттэбит орто оскуолатыгар практикалана кэлбит, эдэр ыччаппыт Надежда Аргунова, оҕолору иилээн — саҕалаан, салайан аҕаланнар, Кыайыы скверигэр Россиябыт күнүн уруйдаан — айхаллаан аастыбыт.

Кэлэр кэнчээри ыччат оҕолорбут Улуу Россиябыт историятын туһунан элбэҕи билэн — көрөн бартара буолуо диэн эрэнэбит. Бүгүҥҥү тэрээһиммит үөрүүлээх аһыллыытын, олохтоох дьаһалта баһылыгын солбуйааччыта Петр Степанов эҕэрдэ дакылаатынан арыйда. Россия бырааһынньыгын суолтатын туһунан олохтоох библиотека сэбиэдиссэйэ Мария Обутова кырачааннарбытыгар анаан иһитиннэрии оҥордо. Улуу Россиябытын уруйдаан — айхаллаан туран, хоһооннору дорҕоонноохтук аахтылар, олохтоох дьаһалта исписэлиистэрэ Александра Иванова, Мария Захарова уонна култуура үлэһитэ Евдокия Охлопкова. Оҕолорбутугар анаан асфальтка уруһуй күрэхтэрэ, ону тэҥэ «Россия — мин улуу дойдум!» диэн ааттаах флешмоб үҥкүүтүнэн бырааһынньыгы түмүктээтибит. Бырааһынньыгынан үүнээйи атыытын дьаарбаҥката ыытылынна. Ити курдук, Сииттэбит нэһилиэгэр Россия күнүн бэлиэтээн олус астынныбыт.

Марианна Сивцева