Сииттэ нэһилиэгэр үтүөнү — кэрэни кэрэһэлии, санааны — оноону сайгыы, алгыс баһа сыалыы, ыраах Дьокуускай куораттан, быстах байыаннай дьайыыга, күҥҥэ көрбүт көмүс оҕолорун атаарбыт, сүтэрбит, күүстээх санаалаах саха маанылаах хотуттара, эйэҕэс, истиҥ ийэлэрэ ис сүрэхтэриттэн кэлэн үлэлээн — хамсаан бардылар. Ол курдук, Россия норуодунай эмчиттэрин сойууһун Саха сиринээҕи салаатын бэрэссэдээтэлэ, норуот эмчитэ, алгысчыт Вероника Николаевна Семенова — Хомусчаана уонна СВОҕа сылдьар оҕолоох ийэ, массажист Анна Степановна Корнилова кэлэн ыалдьыттаатылар.
Кинилэр массаас араас көрүҥүн, илбийии, түөннээһин, хааннааһын курдук ньымалары туһаннылар, ону кытта бар дьоммутун арчылаан, алгыс тыл бастыҥын түһэрдилэр. Эмчиттэрбит үтүө санаалаах үлэлэрин, быстах байыаннай дьайыыга сылдьар оҕолордоох төрөппүттэргэ анаан, босхо эмтээн — томтоон, массаастаан, ыраастаан, алгыс толоруутун сиэринэн — туомунан үлэлэрин саҕалаабыттара, бар дьоммутугар өссө күүстээх эрэли сахпыта чуолкай. Төрөппүт оҕолоро этэҥҥэ сылдьан, хайаан да Кыайыы көтөллөөх, төрөөбүт төрүт дойдуларыгар төннөн кэлиэхтэрэ диэн улахан эрэли үөскэппитэ саарбаҕа суох.
Ол курдук, Сииттэбит нэһилиэгэр, СВО төрөппүттэриттэн таһынан, барыта 70 — ча киһи массаастанан, астынан тарҕаспыттарын туһунан, баҕа санаа кинигэтигэр суруйбуттара туоһулуур. Хас биирдии киһини кытта үтүө санаалаах эмчиттэрбит, ис сүрэхтэн аһаҕастык кэпсэтэн, санаа тууйуллуутуттан өһүлэн, күүстээх санааннан кынаттаналларын туһугар бу үлэлэрэ туһуланна. Онон сииттэлэр өтөрүнэн эмтэммэтэхпитин эмтэнэн, массаастанан олус астынан олоробут.
Үтүө санаалаах, Сииттэбит ыалдьытымсах дьиэ кэргэн аҕатыгар Николай Захаровка истиҥ-сылаас көрсүүтүгэр, минньигэс аһыгар-үөлүгэр улахан махталларын тиэрдэллэр. Кэлэр-барар сырыыларын босхо таспыт баһылыкпытыгар Семен Тимофеевка, эдэр ыччаппытыгар Василий Сивцевка, ону тэҥэ биир дойдулаахтарын ааттарыттан Саха сирин көмүс волонтердарын көхтөөх кыттааччытыгар Светлана Жирковаҕа истин махталбытын тиэрдэбит. Нэһилиэкпит олохтоохторо бу туһалаах сырыы өссө да салҕанарыгар баҕа санааларын тириэрдэ хааллылар.
Марианна Сивцева